ఎల్నీనో ప్రభావంతో వర్షపాతం తగ్గింది: రైతులకు మంత్రి పొంగులేటి అప్రమత్తం

తెలంగాణ రాష్ట్రంలో ఎల్నీనో ప్రభావంతో వర్షపాతం తగ్గిందని, రైతులు అప్రమత్తంగా ఉండాలని మంత్రి పొంగులేటి శ్రీనివాస్ రెడ్డి సూచించారు. రాష్ట్ర క్యాబినెట్ సమావేశంలో ఈ అంశంపై చర్చించి తక్షణ చర్యలు చేపట్టాలని నిర్ణయించారు.

జూన్ 17 నుండి జూలై 17 మధ్య కాలంలో రాష్ట్రంలో ఏ జిల్లాలోనూ సాధారణ స్థాయిలో వర్షపాతం నమోదు కాలేదని మంత్రి తెలిపారు. వర్షం లేకపోవడంతో తాగునీరు, విద్యుత్, పశువుల మేత వంటి సమస్యలు తలెత్తే అవకాశం ఉందని ఆయన ఆందోళన వ్యక్తం చేశారు.

దీనిపై ప్రతి ఉమ్మడి జిల్లాకు ఒక ఇంచార్జి మంత్రిని, సీనియర్ ఐఏఎస్ అధికారిని నియమించాలని క్యాబినెట్ నిర్ణయించింది. జిల్లా స్థాయి కమిటీలను ఏర్పాటు చేసి, వ్యవసాయ శాస్త్రవేత్తలు, అనుభవజ్ఞులైన రైతులు, ప్రజా ప్రతినిధులతో సమావేశాలు నిర్వహించాలని ఆదేశించారు. ఈ కమిటీలు భవిష్యత్తు ప్రణాళికపై నివేదిక తయారు చేసి సమర్పించాలని నిర్ణయించారు.

ఈ చర్యల వల్ల వర్షాధార ప్రాంతాల్లో రైతులు ఇబ్బందులు తగ్గే అవకాశం ఉందని ప్రభుత్వం భావిస్తోంది. నీటి లభ్యతపై శాస్త్రవేత్తలు, అధికారులు నిరంతరం పర్యవేక్షిస్తున్నారు.