యూట్యూబర్ ప్రశ్న రావణ్‌పై యుఎపిఎ సెక్షన్లతో కేసు నమోదు, గన్నవరంలో అరెస్ట్

యూట్యూబ్ ఛానెల్ 'ప్రశ్న' నిర్వాహకుడు బచ్చలకూరి జోసఫ్ (ప్రశ్న రావణ్) ను గన్నవరం పోలీసులు ఆదివారం అరెస్టు చేశారు.

సిపిఐ (మావోయిస్ట్) అనే నిషేధిత సంస్థను కీర్తించే, ఉగ్రవాద భావజాలాన్ని ప్రచారం చేసే వీడియోను సోషల్ మీడియాలో అప్‌లోడ్ చేసి సర్క్యులేట్ చేశారన్న ఆరోపణపై ఈ అరెస్ట్ జరిగింది. గరిపాటి శివశంకర్ అనే వ్యక్తి ఇచ్చిన ఫిర్యాదు మేరకు 2026 జూన్ 28న ఎఫ్‌ఐఆర్ నం. 188/2026 నమోదు చేశారు.

ఈ కేసులో బిఎన్ఎస్ లోని 147 (ప్రభుత్వంపై యుద్ధం చేయడం), 148, 152, 192, 197, 353 వంటి సీరియస్ సెక్షన్లతో పాటు యుఎపిఎ (చట్టవిరుద్ధ కార్యకలాపాల నిరోధక చట్టం) సెక్షన్ 39 కింద కేసు నమోదైంది. ఫిర్యాదులో నిందితుడు తన వీడియోలో సిపిఐ (మావోయిస్ట్) లో చేరాలని యువతను ప్రోత్సహించారని, రాష్ట్రానికి వ్యతిరేకంగా సాయుధ తిరుగుబాటుకు పిలుపునిచ్చారని పేర్కొన్నారు.

అయితే, నిందితుని తరఫు న్యాయవాది జడ శ్రవణ్ కుమార్ ఈ ఆరోపణలను ఖండించారు. ఈ వీడియోలో మావోయిస్టుల ప్రస్తావనే లేదని, ఆయన కేవలం రాష్ట్ర ఉప ముఖ్యమంత్రి పవన్ కళ్యాణ్ ను విమర్శించారని చెప్పారు. ప్రభుత్వం తప్పుడు కేసు పెట్టి, తీవ్రవాది ముద్ర వేసి తన క్లయింట్ ను అన్యాయంగా జైలుకు పంపే ప్రయత్నం చేస్తోందని ఆరోపించారు. గతంలో నమోదైన నాలుగు కేసుల్లో బెయిల్ వచ్చినందున, చట్టపరమైన లొసుగులతో కొత్త కేసు పెట్టారన్నది ఆయన వాదన.

నిందితుడిని గన్నవరం కోర్టులో ప్రవేశపెట్టారు. తీవ్రమైన సెక్షన్ల కింద ఈ కేసు నమోదు కావడంతో కోర్టు రిమాండ్ విధించే అవకాశం ఉంది.