తెలంగాణలో జూలై 16 నుంచి వర్షాలు; వడగాలులు తగ్గే అవకాశం

తెలంగాణ రాష్ట్రంలో జూలై 16 నుంచి 19 వరకు తేలికపాటి నుంచి మోస్తరు వర్షాలు కురిసే అవకాశం ఉన్నట్లు వాతావరణ శాఖ అధికారులు తెలిపారు. రేపు (జూలై 15) పశ్చిమ ఉత్తర తెలంగాణ జిల్లాలో వర్షాలు పడే అవకాశం ఉందని వెల్లడించారు.

జూలై 16 నుంచి 19 మధ్య రాష్ట్రంలో తూర్పు జిల్లాల్లో వర్షాలు కురుస్తాయని శాఖ తెలిపింది. ప్రస్తుతం ఎండల తీవ్రత ఎక్కువగా ఉన్న నేపథ్యంలో ఈ వర్షాలతో ఉపశమనం లభించే అవకాశం ఉందని వివరించారు.

జూలై నెలలో సాధారణంగా 32 నుంచి 34 డిగ్రీల గరిష్ట ఉష్ణోగ్రతలు నమోదవుతాయని, అయితే ప్రస్తుతం 36 నుంచి 39 డిగ్రీల వరకు ఉష్ణోగ్రతలు నమోదవుతున్నాయని వాతావరణ శాఖ వివరించింది. ఉత్తర, ఈశాన్య, మధ్య తెలంగాణ జిల్లాల్లో అత్యధిక ఎండ తీవ్రత ఉందని పేర్కొంది. రాబోయే రెండు మూడు రోజులు ఈ పరిస్థితి కొనసాగే అవకాశం ఉందని హెచ్చరించింది.

ఇప్పటికే రాష్ట్రంలో పొడి వాతావరణం కొనసాగుతున్నప్పటికీ, ఈరోజు (జూలై 14) ఉత్తర, ఈశాన్య తెలంగాణలో అక్కడక్కడ తేలికపాటి జల్లులు, ముసురు వర్షాలు పడే అవకాశం ఉందని వాతావరణ శాఖ తెలిపింది.