వానాకాలం కూరగాయల సాగు: నారుమడి నుంచి పంటకోత వరకు కీలక సూచనలు

వర్షాకాలం (ఖరీఫ్) లో కూరగాయల సాగు అధిక దిగుబడికి అవకాశం ఉన్నా, అధిక వర్షాలు, తెగుళ్లు వంటి సవాళ్లు ఎదురవుతాయి. రైతులు ఈ సమస్యలను అధిగమించి మెరుగైన ఆదాయం పొందడానికి నారుమడి నుంచి పంటకోత వరకు పాటించాల్సిన మేలైన యాజమాన్య పద్ధతులను పోలాసా అగ్రికల్చర్ పాలిటెక్నిక్ కాలేజీ అసిస్టెంట్ ప్రొఫెసర్ డాక్టర్ కే. స్వాతి వివరించారు.

భారీ వర్షాల వల్ల పొలాల్లో నీరు నిలిస్తే వేర్లు కుళ్లి మొక్కలు పోషకాలను గ్రహించలేవు. అందుకే కాలువల ద్వారా అదనపు నీటిని వెంటనే తొలగించాలి. నారుమడిలో నారుకుళ్లు రాకుండా 3 గ్రాముల కాపర్ ఆక్సిక్లోరైడ్ ను లీటరు నీటికి కలిపి పిచికారి చేయాలి. కీడు పురుగుల నివారణకు కార్బోఫిరాన్ 3జి గుళికలను నారుమడిలో పలచగా చల్లాలి.

టమాటా పంటలో కలుపు నివారణకు మెట్రిబ్యూసిన్ (300 గ్రా./ఎకరా, 200 లీ. నీటితో) పిచికారి చేయాలి. పండు తొలుచు పురుగుల బారి నుంచి కాపాడటానికి 25 రోజుల టమాటా నారుతో పాటు 45 రోజుల బంతి నారును 1:16 నిష్పత్తిలో నాటాలి. బ్యాక్టీరియా ఆకుమచ్చ కోసం ప్లాంటోమైసిన్, కాపర్ ఆక్సిక్లోరైడ్ కలిపి పిచికారి చేసుకోవాలి. వంగలో దీపపు పురుగులను అదుపు చేయడానికి డైమితోట్ (2 మి.లీ./లీ.) వేపనూనెతో పాటు పిచికారి చేయాలి.

ఉల్లి నారును ఆగస్టు మొదటి పక్షంలోనే నాటాలి. నారుకుళ్లు, రసం పీల్చే పురుగుల బెడద నివారించడానికి కాపర్ ఆక్సిక్లోరైడ్, కార్బోఫిరాన్/ఫిప్రోనిల్ గుళికలు వాడాలి. నాటిన 24-48 గంటల్లో ఆక్సిఫ్లోరోఫిన్ (1 మి.లీ./లీ.) పిచికారి చేస్తే కలుపు నివారణ జరుగుతుంది. మిరప నారులో విత్తన శుద్ధి చేయకపోతే నారుమడిలో ఫిప్రోనిల్ లేదా కార్బోఫిరాన్ గుళికలు చల్లాలి.

చిక్కుడు వంటి పందిరి కూరగాయలను ఆగస్టులో విత్తుకోవచ్చు. విత్తనాలను థైరాం/క్యాప్టాన్, ఇమిడాక్లోప్రిడ్ తో శుద్ధి చేస్తే వర్షాకాలంలో వచ్చే తెగుళ్ల నుంచి రక్షణ లభిస్తుంది. పోషక లోపం నివారణకు 19:19:19 ఎరువు (2-4 గ్రా./లీ.) పిచికారి చేస్తే మొక్కలు పోషకాలు గ్రహిస్తాయి. ఈ జాగ్రత్తలతో ఖరీఫ్‌లో అధిక దిగుబడి, లాభాలు పొందవచ్చని డాక్టర్ స్వాతి సూచించారు.