రాజమహేంద్రవరం ప్రభుత్వ పాఠశాలలో సీట్ల కోసం పోటీ; నో అడ్మిషన్ బోర్డు

రాజమహేంద్రవరం వీవర్స్ కాలనీలోని శ్రీ నాగరాజ స్పెషల్ మున్సిపల్ ప్రభుత్వ పాఠశాలలో సీట్లు పూర్తిగా నిండిపోయాయి.

దీంతో యాజమాన్యం 'నో అడ్మిషన్' బోర్డు పెట్టింది. గత విద్యా సంవత్సరంలో 10వ తరగతిలో 100% ఉత్తీర్ణత, 42 మంది విద్యార్థులు 500 మార్కులపై సాధించడం, ఇద్దరు విద్యార్థులకు ప్రభుత్వ ITI సీట్లు రావడంతో స్కూల్ పేరు మారుమోగింది.

స్కూల్లో డిజిటల్ స్క్రీన్లు, AI సాంకేతికతతో పాఠాలు చెప్పడం, సైన్స్ కిట్లు, స్పోర్ట్స్, యోగా వంటి యాక్టివిటీస్ ఉన్నాయి. విద్యార్థుల అర్థమయ్యే స్థాయిని హిస్టోగ్రామ్ గ్రాఫ్ ద్వారా టీచర్లు పర్యవేక్షిస్తారు. చదువులో వెనకబడిన విద్యార్థులకు ప్రత్యేక తరగతులు, సాయంత్రం ఎక్స్‌ట్రా క్లాసులు నడుస్తాయి.

తల్లిదండ్రుల నుంచి భారీగా అడ్మిషన్ డిమాండ్ రావడంతో బెంచీలు సరిపోక కింద కూర్చోబెట్టి పాఠాలు చెప్పాల్సి వస్తోంది. కొందరు తల్లిదండ్రులు సీట్ల కోసం స్థానిక నేతలపై ఒత్తిడి తెస్తున్నారు.

రాష్ట్ర ప్రభుత్వం ప్రభుత్వ బడుల్లో అడ్మిషన్లు పెంచేందుకు ప్రత్యేక ప్రచారం, మౌలిక సదుపాయాల కల్పనకు చర్యలు తీసుకుంటోంది. పెరిగిన విద్యార్థులకు అదనపు బెంచీలు, వాష్‌ రూమ్‌ల కోసం స్కూల్ యాజమాన్యం ప్రభుత్వానికి నివేదిక పంపింది.