రామ్ మందిర్ విరాళం చోరీ: సీసీటీవీ ఫుటేజ్ చూపించడంతో నిందితుడు అవినాష్ శుక్లా నేరం ఒప్పుకున్నాడు

అయోధ్య రామ్ మందిర్ విరాళాల దొంగతనం కేసులో కీలక పరిణామం చోటు చేసుకుంది. ప్రధాన నిందితుడు అవినాష్ శుక్లా (Avinash Shukla) నేరం ఒప్పుకున్నాడు. 45 రోజుల పాటు జరిగిన చోరీల సీసీటీవీ ఫుటేజీని పోలీసులు అతనికి చూపించడంతో అవినాష్ భావోద్వేగానికి లోనై తప్పొప్పుకున్నాడు. 13 గంటల పోలీస్ కస్టడీ రిమాండ్‌లో మొదట నేరాన్ని ఖండించిన అతను, వీడియోలో తాను డబ్బు దొంగిలిస్తున్న దృశ్యాలు స్పష్టంగా కనిపించడంతో బ్రేక్ డౌన్ అయ్యాడు.

దొంగిలించిన డబ్బుతో బ్రెజ్జా ఎస్యూవీ కొనుగోలు చేసినట్లు, తన సోదరుడు అభిషేక్ శుక్లా పేరుతో రిజిస్టర్ చేయించినట్లు అవినాష్ విచారణలో వెల్లడించాడు. అభిషేక్ ప్రభుత్వ టీచర్ కావడంతో అనుమానం రాకుండా ఉండేందుకు ఆ పేరు వాడానని చెప్పాడు. ఈ స్కామ్ వెలుగులోకి రాగానే కారును అయోధ్య నుంచి ప్రతాప్‌గఢ్‌కు మార్చేశాడు. పోలీసులు ఈ బ్రెజ్జా కారు (UP42 AP 654)ను సీజ్ చేశారు.

నిందితులందరికీ ఒకరి పాత్ర ఒకరికి తెలుసని, వారంతా కలిసి నిర్మానుష్య ప్రదేశాల్లో సమావేశమై చోరీలు ప్లాన్ చేసేవారని అవినాష్ చెప్పినట్లు పోలీసు వర్గాలు తెలిపాయి. అలవాటైన దొంగ అని అతన్ని పోలీసులు గుర్తించారు. ఇప్పటికే అవినాష్ నుంచి రూ. 20 లక్షలకు పైగా నగదు స్వాధీనం చేసుకున్నారు.

రామ్ మందిర్ భక్తుల నమ్మకాన్ని దెబ్బతీసిన ఈ కేసులో నిందితుడి ఒప్పుకోలు దర్యాప్తును మరింత ముందుకు తీసుకెళ్లే అవకాశం ఉంది. మిగతా ఏడుగురు నిందితుల ప్రమేయంపై పోలీసులు దర్యాప్తు కొనసాగిస్తున్నారు.