నవంబర్ 5న రమా ఏకాదశి, గురు ఏకాదశి, గోవత్స ద్వాదశి కలిసి వచ్చాయి

నవంబర్ 5వ తేదీ గురువారం రమా ఏకాదశి, గురు ఏకాదశి, గోవత్స ద్వాదశి — ఈ మూడు విశేషాలు ఒకే రోజు కలిసి వచ్చాయి. ఆశ్వయుజ మాసం బహుళ పక్షంలో వచ్చే ఏకాదశి కావడంతో దీన్ని రమా ఏకాదశి అంటారు. ఏకాదశి గురువారం రావడంతో గురు ఏకాదశి అని కూడా పిలుస్తారు.

రమ అంటే లక్ష్మీదేవి. ఏడాదిలో వచ్చే 24 ఏకాదశుల్లో లక్ష్మీదేవికి ఇష్టమైనది ఈ ఏకాదశి ఒక్కటే అని శాస్త్రాలు చెప్తున్నాయి. అందుకే ఈ రోజు లక్ష్మీనారాయణులను కలిసి పూజించాలని సూచిస్తారు. ఇలా పూజిస్తే ఐశ్వర్యం, అదృష్టం, వృత్తిపరమైన అభివృద్ధి కలుగుతాయని భక్తుల విశ్వాసం.

ఉదయాన్నే స్నానం చేసి పూజా గదిలో లక్ష్మీనారాయణుల ఫోటో ఉంచాలి. ప్రమిదలో ఆవునెయ్యి లేదా నువ్వుల నూనె పోసి దీపం వెలిగించాలి. తులసి దళాలు, చామంతి పూలతో పూజ చేయాలి. 'ఓం లక్ష్మీ నారాయణాయ నమః' మంత్రాన్ని 108, 54 లేదా 21 సార్లు జపించాలి. పచ్చ కర్పూరంతో హారతి ఇచ్చి, తీపి పదార్థాలను నైవేద్యంగా పెట్టాలి.

గురు ఏకాదశిని గురు గ్రహ బలం పెరిగే రోజుగా భావిస్తారు. స్నానం చేసేటప్పుడు కొద్దిగా పసుపు నీటిలో వేసుకోవడం ఆనవాయితీ. 'దేవానాం ఋషీణాం చ గురుం కాంచన సన్నిభం' అనే గురు ధ్యాన శ్లోకాన్ని 16 సార్లు చదవాలని సూచిస్తారు. చదవలేని వారు 'ఓం బ్రిం బృహస్పతయే నమః' మంత్రాన్ని 21 సార్లు జపించవచ్చు. ఈశాన్య మూలలో ఆవునెయ్యితో గురు దీపం వెలిగించడం, శెనగలను పసుపు రంగు వస్త్రంలో కట్టి దానం చేయడం కూడా ఈ రోజు ఆచారాల్లో ఉన్నాయి.

సాయంత్రం అయ్యేసరికి ద్వాదశి ప్రారంభమవుతుంది. దీన్ని ఆశ్వయుజ బహుళ ద్వాదశి లేదా గోవత్స ద్వాదశి అంటారు. ఆవు, దూడ ఉన్న చోటకు వెళ్లి 'ఓం సురభే నమః' అని జపిస్తూ ప్రదక్షిణలు చేయాలని చెప్తారు. సాధ్యమైతే గడ్డి లేదా తవుడు తినిపించాలి.

ఏకాదశి ఉపవాసం గురించి పద్మ పురాణంలో ముచికుందుడి కథ చెప్పబడుతుంది. ఉపవాసం ఉండలేని వారు పగలు పాలు, పండ్లు తీసుకోవచ్చు. రాత్రి జాగరణ చేసి విష్ణుమూర్తిని స్మరించుకోవాలి. అలవాటు లేని వారు రాత్రి గోధుమ రవ్వతో చేసిన పదార్థాలు తినవచ్చు, దీన్ని హరినక్తం అంటారు. ఉపవాసం చేయలేని వారు 'ఓం లక్ష్మీ నారాయణాభ్యాం నమః' మంత్రాన్ని మనసులో జపించవచ్చు. అన్నదానం, వస్త్రదానం, నువ్వుల దానం చేయడం మంచిదని శాస్త్రాలు చెప్తున్నాయి.