సోమవారం, చతుర్దశి, ఆరుద్ర నక్షత్రం కలయిక: 100 ఏళ్లకు ఒకసారి రాబోతున్న విశేష శివారాధన దినం

పంచాంగం ప్రకారం, ఈరోజు సోమవారం, చతుర్దశి తిథి, ఆరుద్ర నక్షత్రం కలిసి వచ్చాయి. జ్యోతిష్య పండితులు దీన్ని అరుదైన త్రివేణి సంగమంగా అభివర్ణిస్తున్నారు. ఈ మూడింటి కలయిక 100 సంవత్సరాలకు ఒకసారి మాత్రమే సంభవిస్తుందని వారు తెలిపారు.

శివారాధనకు ఈ రోజు ఎంతో విశేషమైనదని ధార్మిక నిపుణులు సూచిస్తున్నారు. ఈ రోజు శివార్చన చేస్తే అనేక జన్మల పాపాలు తొలగిపోతాయని, ఆర్థిక, ఆరోగ్య, కుటుంబ సమస్యలు తీరుతాయని వారు వివరించారు. పంచోపచార పూజ (గంధం, పుష్పం, ధూపం, దీపం, నైవేద్యం) ద్వారా శివానుగ్రహాన్ని పొందవచ్చునని చెప్తున్నారు.

ప్రత్యేకంగా నల్ల కలువ పుష్పాలు పరమేశ్వరుడికి ప్రీతిపాత్రమైనవని, ఈ పుష్పాల మాల సమర్పిస్తే కైలాసంలో నివాసం లభిస్తుందని శివ మహాపురాణంలో నమోదైంది. తుమ్మిపూల కంటే ఈ పుష్పాలకు ఎక్కువ ప్రాముఖ్యత ఉందని గ్రంథాలు తెలియజేస్తున్నాయి. దీపారాధన సమయంలో మారేడు దళం ఉపయోగించాలనీ, నైవేద్యంలో కొబ్బరి, అరటిపండు, ఎండు ద్రాక్ష, ఖర్జూరంతో పాటు చిత్రాన్నం, పాయసం సమర్పించాలని సూచిస్తున్నారు.

ఇంకా ఆర్థిక ఇబ్బందులు, నవగ్రహ దోషాలు తొలగించుకునేందుకు ‘ఓం నమో భగవతే రుద్రాయ శ్రీ శివాయ మహాదేవాయ ఐశ్వర్యేశ్వరాయ నమః’ అనే మంత్రం జపించాలని పండితులు సిఫారసు చేస్తున్నారు. ఈ మంత్రాన్ని ప్రదోష కాలంలో జపిస్తే మంచి ఫలితాలు కలుగుతాయని చెబుతున్నారు. భక్తులు ఈ రోజు శివాలయాలకు వెళ్లి విశేష పూజలు నిర్వహించవచ్చు.