యంగ్ ఇండియా స్పోర్ట్స్ యూనివర్సిటీని ప్రారంభించిన సీఎం రేవంత్, 2036 ఒలింపిక్స్ లక్ష్యం

సీఎం రేవంత్ రెడ్డి, ఇండియన్ ఒలింపిక్ అసోసియేషన్ అధ్యక్షురాలు పీటీ ఉషతో కలిసి గచ్చిబౌలి స్టేడియంలో యంగ్ ఇండియా స్పోర్ట్స్ యూనివర్సిటీని ప్రారంభించారు. ఈ సందర్భంగా సీఎం మాట్లాడుతూ 2036లో భారత్లో జరిగే ఒలింపిక్స్‌కు హైదరాబాద్ వేదిక కావాలన్నది తన లక్ష్యమని అన్నారు.

82 ఎకరాల్లో నిర్మిస్తున్న ఈ యూనివర్సిటీని 2028 డిసెంబర్ నాటికి పూర్తి చేయాలని ప్రభుత్వం లక్ష్యంగా పెట్టుకుంది. రాష్ట్రంలో క్రీడలను ప్రోత్సహించేందుకు ప్రత్యేక స్పోర్ట్స్ పాలసీ తీసుకొచ్చామని సీఎం తెలిపారు. యూనివర్సిటీ నిర్వహణలో ఎలాంటి రాజకీయ ప్రమేయం ఉండదని స్పష్టం చేశారు.

గత 20 ఏళ్లలో హైదరాబాద్‌లో ఒక్క అంతర్జాతీయ క్రీడా ఈవెంట్ కూడా జరగలేదని సీఎం గుర్తు చేశారు. యువత సోషల్ మీడియాలో సమయం వృథా చేయకుండా క్రీడల్లో రాణించాలని పిలుపునిచ్చారు.

పీటీ ఉష మాట్లాడుతూ దేశానికి గొప్ప కోచ్లు, ట్రైనర్లు, స్పోర్ట్స్ సైంటిస్టులు అవసరమన్నారు. క్రీడల్లో నెవర్ గివప్ ఆటిట్యూడ్‌తో ఉండాలని సూచించారు.

అంతర్జాతీయ, జాతీయ క్రీడా పోటీలలో సత్తా చాటిన క్రీడాకారులకు సీఎం రూ.7 కోట్లకు పైగా నగదు బహుమతులు అందజేశారు. మంత్రి వాకిటి శ్రీహరి సీఎం కప్ పోటీల్లో తొలి రెండు విడతలలో 8.5 లక్షల మంది పాల్గొన్నట్టు తెలిపారు.