CM రేవంత్ రెడ్డి 20 ఏళ్ల రాజకీయ జీవితం: స్వతంత్ర ZPTC నుంచి ముఖ్యమంత్రి వరకు

తెలంగాణ ముఖ్యమంత్రి రేవంత్ రెడ్డి ప్రజా ప్రతినిధిగా ఎన్నికై 20 ఏళ్ళు పూర్తయింది. ఈ సందర్భంగా ఆయన జూలై 4, శనివారం మహబూబ్‌నగర్ జిల్లా మిడ్జిల్‌కు వెళ్లనున్నారు. తొలిసారి ప్రజా ప్రతినిధిగా గెలిపించిన మిడ్జిల్ ప్రజలకు ధన్యవాదాలు తెలియజేసేందుకు కృతజ్ఞత వందనం సభలో పాల్గొననున్నారు.

రేవంత్ రెడ్డి కాలేజీ రోజుల్లో ఏబీవీపీ కార్యకర్తగా రాజకీయ ప్రస్థానం మొదలుపెట్టారు. తర్వాత తెలంగాణ రాష్ట్ర సమితి (టీఆర్ఎస్)లో చేరి ప్రత్యేక తెలంగాణ ఉద్యమంలో పాల్గొన్నారు. 2006లో మిడ్జిల్ నుంచి స్వతంత్ర అభ్యర్థిగా జెడ్పీటీసీ ఎన్నికల్లో గెలిచారు. 2007లో మహబూబ్‌నగర్ స్థానిక సంస్థల ఎమ్మెల్సీగా కూడా స్వతంత్రంగానే విజయం సాధించారు.

2008లో టీడీపీ అధినేత చంద్రబాబు నాయుడిని కలిసి పార్టీలో చేరారు. 2009లో కొడంగల్ నియోజకవర్గం నుంచి ఎమ్మెల్యేగా పోటీ చేసి అప్పటివరకు ఐదుసార్లు గెలిచిన కాంగ్రెస్ అభ్యర్థి గురునాథ్ రెడ్డిపై విజయం సాధించారు. 2014 తెలంగాణ తొలి అసెంబ్లీ ఎన్నికల్లో అదే స్థానం నుంచి 14వేలకు పైగా మెజార్టీతో గెలిచారు. ఆ తర్వాత టీడీపీ వర్కింగ్ ప్రెసిడెంట్‌గా బాధ్యతలు నిర్వహించారు.

2015లో ఓటుకు నోటు కేసులో అరెస్టయ్యారు. నామినేటెడ్ ఎమ్మెల్యేకు లంచం ఇచ్చారన్న ఆరోపణలపై యాంటీ కరప్షన్ బ్యూరో (ఏసీబీ) ఈ కేసు నమోదు చేసింది. కోర్టులో ఈ కేసు విచారణ కొనసాగుతోంది.

2017 అక్టోబర్‌లో టీడీపీని వీడి రాహుల్ గాంధీ సమక్షంలో కాంగ్రెస్‌లో చేరారు. 2018లో టీపీసీసీ వర్కింగ్ ప్రెసిడెంట్‌గా నియమితులయ్యారు. అదే ఏడాది అసెంబ్లీ ఎన్నికల్లో కొడంగల్‌లో ఓటమి ఎదుర్కొన్నారు. ఆరు నెలల వ్యవధిలోనే 2019 లోక్‌సభ ఎన్నికల్లో మల్కాజిగిరి నుంచి ఎంపీగా విజయం సాధించారు. 2021లో తెలంగాణ కాంగ్రెస్ అధ్యక్షుడిగా ఎన్నికయ్యారు.

2023 అసెంబ్లీ ఎన్నికల్లో ఆరు గ్యారెంటీల హామీతో ప్రచారం చేసి కాంగ్రెస్‌ను అధికారంలోకి తీసుకొచ్చారు. 119 స్థానాలకు 64 గెలిచి స్పష్టమైన మెజారిటీతో ప్రభుత్వం ఏర్పాటు చేసింది. సీనియర్లు ఉన్నప్పటికీ పార్టీ అధిష్టానం రేవంత్ రెడ్డినే ముఖ్యమంత్రిగా ఎంపిక చేసింది.