పెట్టుబడులు, ఉద్యోగాల కల్పనే ప్రభుత్వ లక్ష్యం: సీఎం రేవంత్ రెడ్డి

మహబూబ్‌నగర్ జిల్లా దివిటిపల్లిలో అమరరాజా సంస్థ ఈవీ బ్యాటరీ ప్లాంట్ ప్రారంభోత్సవంలో సీఎం రేవంత్రెడ్డి మాట్లాడారు. పెట్టుబడులు, ఉద్యోగాల కల్పనే తమ ప్రభుత్వ ప్రధాన లక్ష్యమని ఆయన తెలిపారు.

32 గిగావాట్ సామర్థ్యంతో ఏర్పాటైన ఈ ప్లాంట్ ద్వారా 700 మందికి ఉద్యోగ అవకాశాలు లభించాయి. వీరిలో 400 మంది మహిళలు ఉండడం గమనార్హం. 1983లో చిత్తూరు జిల్లాలో ప్రారంభమైన అమరరాజా సంస్థ, తన సొంత జిల్లా బయట మొదటిసారి ఈ పెట్టుబడి పెట్టింది.

గత ప్రభుత్వాల విధానాల గురించి మాట్లాడిన రేవంత్రెడ్డి, ప్రజా ప్రయోజనం, పారిశ్రామిక ప్రోత్సాహం కలిగించే విధానాలను తమ ప్రభుత్వం కొనసాగిస్తూ మరింత మెరుగుపరిచిందని చెప్పారు. ఎనర్జీ, పారిశ్రామిక, టూరిజం, వైద్య, ఎగుమతుల తదితర పాలసీలు రూపొందించినట్లు వివరించారు.

రాష్ట్ర ఆర్థిక లక్ష్యాలపై దృష్టి పెట్టిన సీఎం, 2034 నాటికి తెలంగాణను 1 ట్రిలియన్ డాలర్ల ఆర్థిక వ్యవస్థగా తీర్చిదిద్దాలన్నారు. 2047 నాటికి భారతదేశం 30 ట్రిలియన్ డాలర్ల స్థాయికి చేరితే, ఇందులో 10 శాతం వాటాను తెలంగాణ అందించాలని లక్ష్యంగా పెట్టుకున్నట్లు తెలిపారు. ఔటర్ రింగ్ రోడ్డు, రీజినల్ రింగ్ రోడ్డు మధ్య ప్రాంతంలో తయారీ జోన్లు, ఆర్ఆర్ఆర్ బయట వ్యవసాయ గ్రామీణ ఆర్థిక వ్యవస్థగా విభజించి అభివృద్ధి చేస్తామని చెప్పారు.

పాలమూరు జిల్లాకు ప్రత్యేక ప్రాధాన్యత ఇస్తూ, విద్య, నీటిపారుదల, పారిశ్రామిక రంగాలపై దృష్టి పెట్టినట్లు సీఎం తెలిపారు. ఇప్పటికే ఇక్కడ ట్రిపుల్‌ఐటీ, ఇంజనీరింగ్ కాలేజీలు, యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ళు తీసుకొచ్చామన్నారు. నీటి వనరుల కోసం పాలమూరు-రంగారెడ్డి ఎత్తిపోతల పథకం (90 టీఎంసీ), డిండే ప్రాజెక్టు (30 టీఎంసీ) నీటి కేటాయింపులపై ఆంధ్రప్రదేశ్ ప్రభుత్వంతో చర్చలు జరుగుతున్నాయని, త్వరలో అనుమతులు వస్తాయని ఆశాభావం వ్యక్తం చేశారు.

సీఎం రేవంత్రెడ్డి అమరరాజా యాజమాన్యాన్ని స్థానిక యువతకు అత్యధిక ఉద్యోగాలు ఇవ్వాలని కోరారు. కష్టపడే స్వభావం, చిన్న సహాయాన్ని జీవితాంతం గుర్తుపెట్టుకునే మనస్తత్వం ఈ ప్రాంత ప్రజలదని, కంపెనీ అభివృద్ధికి సంపూర్ణ సహకారం అందిస్తారని విశ్వాసం వ్యక్తం చేశారు.