20 ఏళ్ల రాజకీయ ప్రస్థానం: మిడ్జిల్‌లో సీఎం రేవంత్‌రెడ్డి కృతజ్ఞత సభ

మహబూబ్‌నగర్ జిల్లా మిడ్జిల్‌లో సీఎం రేవంత్‌రెడ్డి ఈరోజు పర్యటించారు. ప్రజా ప్రతినిధిగా 20 ఏళ్లు పూర్తి చేసుకున్న సందర్భంగా ఆయన కృతజ్ఞత సభ నిర్వహించారు.

2006 జూన్‌లో రేవంత్‌రెడ్డి ఇదే మిడ్జిల్ జెడ్పీటీసీగా ఎన్నికయ్యారు. అది ఆయన రాజకీయ జీవితానికి తొలి అడుగు. నాటి నుంచి 20 ఏళ్ల తర్వాత సీఎం హోదాలో ఆ ప్రాంతాన్ని సందర్శించడం విశేషం.

కార్యక్రమంలో భాగంగా రేవంత్‌రెడ్డి ఊరుకొండపేట ఆంజనేయ స్వామి దేవాలయాన్ని సందర్శించి ప్రత్యేక పూజలు నిర్వహించారు. ఆలయ అభివృద్ధి పనులకు శంకుస్థాపన చేశారు. అనంతరం మిడ్జిల్‌లో డాక్టర్ బీఆర్ అంబేద్కర్, దివంగత నేత జపా గోపాల్‌రెడ్డి, ద్యాప గోపాల్‌రెడ్డి విగ్రహాలను ఆవిష్కరించారు.

గతంలో మాజీ ఎమ్మెల్యే జపా గోపాల్‌రెడ్డి మరణించిన తర్వాత ఆయన స్ఫూర్తితోనే తాను ఎన్నికల్లో పోటీ చేసినట్టు రేవంత్‌రెడ్డి పేర్కొన్నారు. 20 ఏళ్ల క్రితం మిడ్జిల్ ప్రజలు తనకు ఘన విజయం అందించారని ఆయన గుర్తు చేసుకున్నారు.

సాయంత్రం 4 గంటలకు మిడ్జిల్‌లో భారీ బహిరంగ సభ జరిగింది. ఇందుకు పోలీసులు భారీ బందోబస్తు ఏర్పాటు చేశారు. జిల్లా ఎస్పీ జానకి పర్యవేక్షించారు. ఈ సభలో తన రాజకీయ ప్రయాణం గురించి రేవంత్‌రెడ్డి ప్రసంగించారు.