సిద్దిపేటలో నవంబర్ 19న సీఎం రేవంత్ రెడ్డి సభ; ఇందిరమ్మ భీమా పథకం ప్రారంభం

నవంబర్ 19న ఇందిరా గాంధీ జయంతి సందర్భంగా సిద్దిపేటలో జరిగే బహిరంగ సభలో ముఖ్యమంత్రి రేవంత్ రెడ్డి పాల్గొననున్నారు. ఈ సభలో ఇందిరమ్మ కుటుంబ భీమా పథకాన్ని రాష్ట్రవ్యాప్తంగా ప్రారంభించనున్నట్లు మంత్రులు తెలిపారు.

సభావేదిక ఏర్పాట్ల కోసం మంత్రులు పొన్నం ప్రభాకర్, వివేక్ వెంకటస్వామి, ప్రభుత్వ చీఫ్ విప్ ఆది శ్రీనివాస్ స్థలాలను పరిశీలించారు. సిద్దిపేట డిగ్రీ కాలేజీ మైదానం, నాగదేవత ఆలయ ప్రాంతం, ఎల్లంకి కాలేజీ వెనుక ఉన్న స్థలాలను వారు చూశారు. జనం రాక, పార్కింగ్, ఇతర సౌకర్యాలను అంచనా వేసేందుకు సర్వే చేసినట్లు మంత్రులు చెప్పారు.

ఈ కార్యక్రమంలో చిలకపచ్చ రంగు ఇందిరమ్మ చీరల పంపిణీ కార్యక్రమాన్ని కూడా ప్రారంభిస్తారు. ప్రభుత్వం ఇచ్చిన హామీలను ఒక్కొక్కటిగా అమలు చేస్తున్న విషయాన్ని సభలో సీఎం ప్రజలకు వివరిస్తారని మంత్రులు తెలిపారు.

ఈ పర్యటనలో కలెక్టర్ హైమావతి, కాంగ్రెస్ పార్టీ నాయకులు పాల్గొన్నారు.