కడపలో RM కిసాన్ సెంటర్ ప్రారంభం; రైతులకు ఆధునిక వ్యవసాయ శిక్షణ

వైఎస్సార్ కడప జిల్లా వీరప్ప నాయనపల్లెలో RM కిసాన్ సెంటర్ ప్రారంభించబడింది. జిల్లా కలెక్టర్ చెరుకూరు శ్రీధర్ ఈ కేంద్రాన్ని ప్రారంభించారు. కమలాపురం ఎమ్మెల్యే పుత్తా చైతన్య రెడ్డి, తెలుగుదేశం పార్టీ రాష్ట్ర ఉపాధ్యక్షుడు పుత్తా నరసింహా రెడ్డి ముఖ్య అతిథులుగా పాల్గొన్నారు.

2023లో 95 ఎకరాల్లో స్థాపించిన ఈ కేంద్రం వ్యవసాయ పరిశోధన, రైతులకు ఉచిత శిక్షణ అందిస్తుంది. ఈ కార్యక్రమంలో ప్రతిభా బయోటెక్ ప్రైవేట్ లిమిటెడ్ సహకారంతో శాస్త్రీయ సాగు, సేంద్రియ వ్యవసాయం, ఆదాయ పెంపుపై అవగాహన సదస్సు నిర్వహించారు.

RM కిసాన్ సెంటర్, కృషి విజ్ఞాన కేంద్రం బారామతీ మధ్య సాంకేతిక సమాచార ఒప్పందం కుదిరింది. రాయలసీమ ప్రాంతంలో ఈ కేంద్రాన్ని హార్టికల్చర్ హబ్‌గా అభివృద్ధి చేయాలని లక్ష్యంగా పెట్టుకున్నట్లు నిర్వాహకులు తెలిపారు. రైతులకు పంటల సాగు నుంచి మార్కెటింగ్ వరకు, తక్కువ పెట్టుబడితో ఎక్కువ లాభాలు సాధించే విధానాలపై శిక్షణ ఇవ్వనున్నారు.