RO నీటిలో TDS ఎంత ఉండాలి? CSIR శాస్త్రవేత్తలు చెప్పిన వివరాలు

RO ప్యూరిఫయర్ నీటిని 100 శాతం శుద్ధి చేసినా అది శరీరానికి ఉపయోగపడదని CSIR శాస్త్రవేత్తలు చెబుతున్నారు. నీటిలో అవసరమైన ఖనిజ లవణాలు లేకుండా ఉంటే ఆ నీరు ఆరోగ్యానికి పూర్తిగా మేలు చేయదని వారు హెచ్చరిస్తున్నారు.

రివర్స్ ఆస్మాసిస్ (RO) ప్రక్రియలో నీటిలోని మలినాలు, ఉప్పు, భార లోహాలు, సూక్ష్మజీవులు తొలగిపోతాయి. అదే సమయంలో కాల్షియం, మెగ్నీషియం వంటి ఖనిజ లవణాలు కూడా తొలగిపోయే అవకాశం ఉంది. దీనివల్ల శరీరానికి అవసరమైన ఖనిజాలు నీటి ద్వారా అందకుండా పోతాయి.

కాల్షియం లోపిస్తే ఎముకలు బలహీనపడతాయి. కీళ్ల నొప్పులు వస్తాయి. పిల్లల్లో చిన్న వయసులోనే ఎముకలు బలహీనపడే ప్రమాదం ఉంది. మెగ్నీషియం లోపిస్తే అధిక రక్తపోటు, హృదయ స్పందనలో హెచ్చుతగ్గులు వస్తాయి. దీనివల్ల గుండెపోటు వచ్చే అవకాశం ఎక్కువ. కండరాల తిమ్మిర్లు, తీవ్రమైన తలనొప్పి, అలసట, విటమిన్ B12 లోపం, అసిడిటీ, గ్యాస్ట్రిక్, అల్సర్లు, జీర్ణక్రియ సమస్యలు రావచ్చని CSIR శాస్త్రవేత్తలు చెప్తున్నారు.

ప్రపంచ ఆరోగ్య సంస్థ (WHO) ప్రకారం తాగునీటిలో లీటరుకు 100 నుంచి 300 mg వరకు TDS ఉండాలి. కానీ చాలా RO ప్లాంట్లు 50 కంటే తక్కువ TDS ఉన్న నీటిని ఇస్తాయి. అంటే ఆ నీటిలో ఉపయోగపడే లవణాలు తొలగించబడుతున్నాయి. నీటిలో TDS 100 నుంచి 300 మధ్య ఉంటే ఆ నీటిని కాచి వడపోసి తాగవచ్చు. 50 కంటే తక్కువ TDS ఉన్న నీరు ఎంత తాగినా శరీరానికి ఉపయోగకరం కాదని శాస్త్రవేత్తలు చెబుతున్నారు.

RO ప్రక్రియలో నీటిని అధిక ఒత్తిడితో సూక్ష్మ రంధ్రాలున్న పొర ద్వారా పంపుతారు. ఇది సీసం, రాగి, క్రోమియం, క్లోరైడ్, సోడియం వంటి పదార్థాలను, లవణాలను తొలగిస్తుంది. అదే సమయంలో కాల్షియం, మెగ్నీషియం, పొటాషియం, నైట్రేట్, ఫ్లోరైడ్ స్థాయిలు కూడా తగ్గుతాయి. కలుషిత నీటిని శుద్ధి చేయడం అవసరమే. కానీ RO చేసినంత మాత్రాన నీరు ఖనిజ లవణాలతో నిండదు. కాబట్టి ఇంట్లో లేదా RO ప్లాంట్ నుంచి తీసుకునే నీటిలో TDS స్థాయిని పరీక్షించుకోవాలని CSIR శాస్త్రవేత్తలు సూచిస్తున్నారు.