విజయవాడలో రూట్స్ హెల్త్ సర్వీసెస్ 13వ వార్షికోత్సవ అవార్డులు: 10 మంది వైద్యులకు సత్కారం

విజయవాడలో రూట్స్ హెల్త్ సర్వీసెస్ 13వ వార్షికోత్సవం నిర్వహించారు. ఈ సందర్భంగా 10 మంది వైద్య నిపుణులు, సామాజిక కార్యకర్తలకు అవార్డులు ప్రదానం చేశారు.

జీవితకాల సాఫల్య పురస్కారం రిటైర్డ్ ప్రొఫెసర్ సర్జన్ డాక్టర్ లక్ష్మీ ప్రసాద్ కు లభించింది. పీఎస్ఎన్ మూర్తి, కోడే ప్రభాదేవి, అక్కినేని మణి, సూర్యదేవర కేశవరావు బాబు, జి రమేష్, వేణుగోపాల్ రెడ్డి, పి శివయ్య, అనిల్, ఆయుర్వేద వైద్యుడు కొండా వెంకటేశ్వరులు తదితరులకు అవార్డులు అందించారు. మంత్రి పార్థసారధి, మహిళా కమిషన్ చైర్పర్సన్ రాయిపాటి శైలజ పురస్కారాలు అందజేశారు.

కార్యక్రమంలో మంత్రి పార్థసారధి మాట్లాడుతూ, అమరావతిలో హెల్త్ టూరిజం అభివృద్ధికి ప్రభుత్వం ప్రోత్సాహకాలు ఇస్తోందని, పెద్ద ఆసుపత్రులు ఏర్పాటు చేయాలని వైద్యులను కోరారు. గ్రామీణ ప్రాంతాల్లో వైద్య శిబిరాలు నిర్వహించాలని, ప్రభుత్వం సహకరిస్తుందని తెలిపారు.

ఈ వేడుకలో సినీ నటుడు సుమన్, నటి రియా రాయ్, సామాజిక కార్యకర్త తేజరాజ సోలంకి పాల్గొన్నారు. రూట్స్ ఫౌండేషన్ గత 13 ఏళ్లలో 72 మంది వైద్యులను సత్కరించింది. ఈ ఏడాది 11 విభాగాల్లో అవార్డులు ఇచ్చినట్లు నిర్వాహకులు తెలిపారు.