టేక్వాండో మెడలిస్ట్ నుంచి ₹600 కోట్ల రూరల్ ఈ-కామర్స్ కంపెనీ వరకు – ‘రోజానా’ వ్యవస్థాపకుల విజయగాథ

హర్యానాలోని ఒక మారుమూల గ్రామంలో టేక్వాండో క్రీడాకారిణిగా ఎదిగిన అంకుర్, చిన్న వయసులోనే పెళ్లి ఒత్తిడిని ఎదుర్కొన్నారు. తండ్రి మల్టీపర్పస్ హెల్త్ వర్కర్, తల్లి నర్సుగా పనిచేస్తున్న ఆ కుటుంబంలో పెళ్లి చేసేయాలనే వాతావరణం నెలకొన్నప్పుడు, ‘నన్ను పెళ్లి చేస్తే ఇంటి నుంచి పారిపోతాను’ అని తండ్రికి స్పష్టంగా చెప్పిన అంకుర్, చదువును ఆయుధంగా ఎంచుకున్నారు. ఆమె టేక్వాండోలో భారతదేశానికి కాంస్య, రజత పతకాలు సాధించినా, క్రీడల కెరీర్ కొనసాగే పరిస్థితి లేదు. చివరకు IIM లక్నోలో చేరి, అక్కడ ఇంటర్న్‌షిప్ సమయంలో తోటి సహచరుడు అద్వైత్‌ను కలిశారు. వీరిద్దరూ కలిసి గ్రామీణ ప్రాంతాల్లో ఆధునిక రిటెయిల్ సేవలు అందించే ‘రోజానా’ (Rozana) పేరిట ఈ-కామర్స్ సంస్థను స్థాపించారు. వ్యాపార భాగస్వామ్యమే ప్రేమగా మారి ఏడాది క్రితం వివాహం చేసుకున్నారు.

రోజానా ప్రధానంగా దేశంలోని 2 లక్షలకు పైగా ఉన్న గ్రామ పంచాయతీలలో 20,000 గ్రామ పంచాయతీలకు సేవలు అందిస్తోంది. సంస్థ ఆన్‌లైన్ ఆర్డర్లతో పాటు గ్రామాల్లోనే ఫిజికల్ ‘ఎక్స్పీరియన్స్ స్టోర్లు’ నిర్వహిస్తోంది. ఒక గ్రామానికి చెందిన ఆర్డర్లను క్లబ్ చేయడం ద్వారా సగటు డెలివరీ విలువను ₹1600 – ₹1700కు పెంచుతుంది. దీంతో సామాన్య ఈ-కామర్స్ సంస్థలకు సాధ్యం కాని తక్కువ ఆర్డర్ విలువలను కూడా లాభదాయకంగా మార్చేస్తుంది. గతేడాది సంస్థ రెవెన్యూ సుమారు ₹580 కోట్లు కాగా, ఈ ఏడాది దానిని ₹1000 కోట్లకు చేర్చాలని లక్ష్యంగా పెట్టుకుంది. ఇప్పటివరకు సంస్థ సుమారు ₹500 కోట్ల నిధులు సమీకరించింది.

రోజానా సరఫరా గొలుసులో స్థానిక మైక్రో ఎంటర్‌ప్రెన్యూర్లు కీలకం. గ్రామ సేవక్ వంటి వ్యక్తులు ఆర్డర్లు సేకరించి డెలివరీ చేస్తారు. ఉదాహరణకు, ప్రభుత్వం నుంచి నెలకు ₹4000 – ₹6000 సంపాదించే గ్రామ సేవక్ కు అదనంగా ₹2000 – ₹3000 వస్తాయి, ఇది అతని నెలవారీ ఆదాయంలో 60% పెరుగుదల. మార్కెటింగ్ ఖర్చు లేకుండా పూర్తిగా ఆర్గానిక్ వృద్ధిని సాధించారు.

కస్టమర్ల అవసరాలు ఆశ్చర్యకరంగా ఉన్నాయి. మొదట్లో మ్యాగీకి విపరీతమైన డిమాండ్ రావడంతో స్టాక్ అయిపోయింది, అప్పుడు పాస్తా, మాకరోనీని పరిచయం చేసి, వాటిని మసాలాతో ఎలా వండాలో యూట్యూబ్ వీడియోలు పంపారు. కొద్ది నెలల్లోనే జీరా తడకతో కూడిన మాకరోనీ, పెన్నే అత్యధికంగా అమ్ముడైన ఉత్పత్తులుగా మారాయి. అదే విధంగా రెడ్ లిప్‌స్టిక్, పుట్టినరోజు కేక్, బొమ్మలు వంటి కేటగిరీలు భారీ డిమాండ్ కలిగి ఉన్నాయి. రాబరేలీ, అమేఠీ జిల్లాల్లో ప్రారంభమైన రోజానా, ఇప్పుడు దేశవ్యాప్తంగా విస్తరిస్తోంది.