ఎస్. జానకి కెరీర్ విషాద గీతాలతోనే మొదలైంది

గుంటూరు జిల్లా రేపల్లె తాలూకా పల్లపట్ల గ్రామంలో జన్మించిన ఎస్. జానకి, తండ్రి శ్రీరామమూర్తి ఆయుర్వేద వైద్యులు. తల్లి సత్యవతి. వీరి ఆరుగురు సంతానంలో ఆమె నాలుగవ వారు. చిన్నప్పటి నుంచే లతా మంగేష్కర్ పాటలంటే ఆమెకు ప్రత్యేక ఆసక్తి. సంగీతం పట్ల ఆమెకు సహజమైన జ్ఞానం ఉండేది. బాల్యంలో కొంతకాలం సిరిసిల్ల (కరీంనగర్ జిల్లా), రాజమండ్రిలో గడిపారు. రాజమండ్రిలో ఉన్నప్పుడు నాదస్వర విద్వాంసుడు గాడవల్లి పైడి స్వామి వద్ద శాస్త్రీయ సంగీత శిక్షణ పొందారు.

యుక్తవయసులో డాక్టర్ చంద్రశేఖరంతో కలిసి సంగీత కార్యక్రమాలు చేసేవారు. ఆయనే తర్వాత ఆమె మామగారు అయ్యారు. చంద్రశేఖరం కుమారుడు వి. రామప్రసాద్ తో జానకి వివాహం జరిగింది. ఆమె గాత్ర సౌందర్యాన్ని గుర్తించిన చంద్రశేఖరం, జెమిని ఏవిఎం స్టూడియోలకు ఉత్తరాలు రాసి అవకాశం కోరారు. ఒకసారి ఆడిషన్ కు రమ్మని పిలుపు వచ్చింది. మద్రాస్ వెళ్లి ఏవిఎం స్టూడియోలో లతా మంగేష్కర్ పాడిన ‘రసిక్ బలామా’ పాటను పాడారు. ఆ పాట విన్న సంగీత దర్శకులు ఆర్. సుదర్శనం, ఆర్. గోవర్ధనం ఆమెను స్టాఫ్ ఆర్టిస్ట్‌గా నెలజీతానికి ఎంపిక చేశారు.

అయితే, ఏవిఎం స్టూడియోలో చేరకముందే 1957 ఏప్రిల్ 4న ఆమె తొలి పాట రికార్డయింది. దర్శకుడు వి. రామచంద్రరావు పరిచయంతో, సంగీత దర్శకుడు టి. చలపతిరావు స్వరాల్లో ‘విధియిన్ వీళ్ళయ్యాటు’ అనే తమిళ చిత్రం కోసం ‘పేదేయ ఎన్ ఆసై పాలానదేను’ అనే విషాద గీతం పాడారు. ఆ చిత్రంలో ఆమె రెండు విషాద పాటలు పాడారు. ఆశ్చర్యకరంగా, ఆమెకు తమిళం రాకపోయినా తొలిసారే తమిళంలో పాడారు. అయితే, ఈ సినిమా విడుదల కాలేదు.

ఆ తర్వాత 1957 మే 5న, గంటసాలతో కలిసి ‘ఎమ్మెల్యే’ సినిమా కోసం ‘నా ఆశ అడియాశ చెయిజారి మణిపూస బ్రతుకంతా అమావాస లంబాడోళ్ళ రామదాస’ అనే విషాద గీతం పాడారు. ఈ రికార్డింగ్ గోల్డెన్ స్టూడియోలో జరిగింది. అదే చిత్రంలో ‘ఇదేనండి ఇదేనండి భాగ్యనగరం’ అనే మరో పాట కూడా పాడారు. ఇలా విషాద గీతాలతో ఆమె ప్లేబ్యాక్ కెరీర్ ప్రారంభమైంది.