ఎస్. జానకి: 17 భాషల్లో 70వేలకు పైగా పాటలు, 65 ఏళ్ల గాన ప్రస్థానం

గాయని ఎస్. జానకి 1938 ఏప్రిల్ 23న గుంటూరు జిల్లా రేపల్లె తాలూకా పాలపట్ల గ్రామంలో జన్మించారు. చిన్నప్పటి నుంచి పాటల మీదే ఆసక్తి ఉండేది.

10 ఏళ్ల వయసులో నాదస్వర విద్వాంసుడు పైడి స్వామి వద్ద శాస్త్రీయ సంగీతం నేర్చుకోవడం మొదలుపెట్టారు. ఆమెకు పాటలంటే అమితమైన ఆసక్తి ఉండేది. రేడియోలో లతా మంగేష్కర్, ఆశా భోంస్లే పాటలు వినడం ద్వారా ఎక్కువగా నేర్చుకున్నారు.

1957లో సంగీత దర్శకుడు తాతినేని చలపతిరావు ఆమెతో తొలి తమిళ పాట పాడించారు. తెలుగులో ‘ఎమ్మెల్యే’ చిత్రంలో ఘంటసాలతో కలిసి మొదటి పాట పాడారు. ఆ సంవత్సరమే ఆరు భాషల్లో 100 పాటలు పాడి రికార్డ్ సృష్టించారు.

తర్వాత ఎంఎస్ విశ్వనాథన్, ఇళయరాజా, సాలూరు రాజేశ్వరరావు, పెండ్యాల నాగేశ్వరరావు వంటి దిగ్గజ సంగీత దర్శకుల నిర్దేశకత్వంలో వేలాది పాటలు పాడారు. శాస్త్రీయ సంగీతంలో థియరీ రాకపోయినా, ప్రాక్టికల్‌గా ఎంతో పాటలకు ప్రాణం పోశారు.

జానకి తెలుగు, తమిళం, మలయాళం, కన్నడ, హిందీ సహా 17 భాషల్లో సుమారు 70 వేలకు పైగా పాటలు పాడినట్లు అంచనా. జాపనీస్, జర్మన్, ఇంగ్లీష్, సంస్కృతం వంటి భాషల్లో కూడా పాడారు.

జాతీయ ఉత్తమ గాయనిగా నాలుగుసార్లు పురస్కారం అందుకున్నారు. తెలుగు, తమిళం, మలయాళం రాష్ట్ర ప్రభుత్వాల నుంచి పలు పురస్కారాలు, కలైమామణి వంటి గౌరవాలు పొందారు.

పాటలే కాకుండా ‘చందమామ రావే’ (1987), ‘జడ్జిమెంట్’ (1990) చిత్రాలకు డబ్బింగ్ చెప్పారు. ‘మౌన పోరాటం’ (1989) చిత్రానికి సంగీత దర్శకత్వం కూడా నిర్వహించారు. చివరి పాటగా 2016లో ‘పత్ కల్పనకల్’ అనే మలయాళ చిత్రంలో ‘ఆరేరారో’ జోల పాట పాడారు.