సాయికృష్ణ కస్టడీ మరణం: నేడు జుడిషియల్ విచారణ, మాజీ మంత్రి అంబటి రాంబాబు హాజరు

సాయి కృష్ణ లాకప్ మరణం కేసులో జిల్లా కలెక్టర్ ఆధ్వర్యంలో జుడిషియల్ విచారణ నేడు ప్రారంభమైంది. ప్రజలు, న్యాయవాదులు, రాజకీయ పార్టీలు తమ వద్ద ఉన్న ఆధారాలు, సాక్ష్యాలను ఈ విచారణకు సమర్పించవచ్చని కలెక్టరేట్ ప్రకటన విడుదల చేసింది.

వైఎస్సార్ కాంగ్రెస్ పార్టీ నేత, మాజీ మంత్రి అంబటి రాంబాబు ఈరోజు ఉదయం 11:30 గంటలకు కలెక్టరేట్‌కు వచ్చి జుడిషియల్ ఎంక్వైరీ ముందు హాజరుకానున్నారు. కస్టడీలో సాయి కృష్ణకు జరిగిన హింసకు సంబంధించిన ఫోటోలు, ఇతర ఆధారాలను ఆయన సమర్పించనున్నట్లు సమాచారం.

ఈ కేసులో ఇప్పటికే ప్రత్యేక దర్యాప్తు బృందం (SIT) విచారణ కొనసాగిస్తోంది. ఇప్పటివరకు ఆరుగురిని అరెస్టు చేసి రిమాండ్‌కు పంపించగా, సీఐ నాగరాజు కస్టడీ కోసం హైకోర్టులో పిటిషన్ దాఖలు చేసింది. నిన్న కృష్ణలంక పోలీస్ స్టేషన్‌లో రక్తపు మరకలున్న లాఠీ, కాలిన బూడిద, సగం కాలిన ఇనప వస్తువులు వంటి కీలక ఆధారాలు సిట్ స్వాధీనం చేసుకుంది.

సీఐ నాగరాజు తనపై ప్రాణహాని ఉందని కోర్టుకు లేఖ రాశారు. అయితే లాకప్ మరణమని సిట్ ధృవీకరించి, కోర్టుకు రిమాండ్ నివేదికలో పేర్కొంది. మృతదేహాన్ని మాయం చేసిన తీరుపై విచారణ కోసం సీఐతో సహా ఇతరులను కస్టడీకి ఇవ్వాలని సిట్ కోరింది.

ఈ జుడిషియల్ విచారణ ఉదయం నుంచి సాయంత్రం వరకు కొనసాగుతుంది. పలు రాజకీయ పార్టీలు, న్యాయవాదులు, ప్రజా సంఘాల నేతలు కూడా హాజరయ్యే అవకాశం ఉంది.