సీబీఐ విచారణ పిటిషన్ ఉపసంహరణపై హైకోర్టు ప్రశ్నలు; సాయి కృష్ణ తల్లిపై మానవ హక్కుల కమిటీ ఆగ్రహం

విజయవాడ సాయి కృష్ణ లాకప్ డెత్ కేసులో సీబీఐ దర్యాప్తు కోరుతూ తల్లి విజయలక్ష్మి దాఖలు చేసిన పిటిషన్ను ఆమె ఉపసంహరించుకోవడంపై హైకోర్టు ప్రశ్నించింది. ఎందుకు వెనక్కి తీసుకున్నారో కారణాలు వివరించాలని ఆదేశించింది.

గత నెల 26న విజయలక్ష్మి హైకోర్టులో హెబియస్ కార్పస్ పిటిషన్‌తో పాటు సీబీఐ విచారణ కోసం అనుబంధ పిటిషన్ దాఖలు చేశారు. తన కుమారుడు పోలీస్ కస్టడీలో చనిపోయాడని, స్వతంత్ర దర్యాప్తు అవసరమని ఆమె కోర్టును ఆశ్రయించారు. కానీ తాజాగా ఈ పిటిషన్ వెనక్కి తీసుకుంటున్నట్లు కోర్టుకు తెలిపారు.

ఈ ఉపసంహరణపై హైకోర్టు ధర్మాసనం ఇలా ప్రశ్నించింది: ‘మొదట సీబీఐ దర్యాప్తు ఎందుకు కోరారు? ఇప్పుడు అదే దర్యాప్తు అవసరం లేదని ఎందుకు భావిస్తున్నారు?’ అని. కేసు విత్డ్రాకు సంబంధించిన పూర్తి కారణాలు కోర్టుకు సమర్పించాలని ఆదేశించి, తదుపరి విచారణను నాలుగు వారాలకు వాయిదా వేసింది.

సాయి కృష్ణ తల్లి తీరుపై మానవ హక్కుల కమిటీ ఆగ్రహం వ్యక్తం చేసింది. న్యాయ పోరాటం నుంచి విజయలక్ష్మి వెనక్కి తగ్గడంపై కమిటీ కన్వీనర్ సతీష్ బాబు అభ్యంతరం తెలిపారు. ‘వ్యవస్థలో లోపాల వల్లే ఇటువంటి లాకప్ డెత్లు జరుగుతున్నాయి. ఈ ఘటనను సమాజానికి జరిగిన అన్యాయంగా చూస్తున్నాం’ అని ఆయన అన్నారు.

సాయి కృష్ణ పిన్ని ఈ పరిణామంపై తీవ్రంగా తప్పుపట్టారు. కొంతమంది ఒత్తిడి వల్లే విజయలక్ష్మి ఇలా వెనక్కి తగ్గారని ఆమె ఆరోపించారు. తనకు ఆ వ్యక్తులు ఎవరో తెలియదని చెప్పారు. సాయి కృష్ణకు న్యాయం జరిగే వరకు పోరాటం కొనసాగిస్తానని స్పష్టం చేశారు. ‘సిట్ రిపోర్ట్ సరిగా లేకపోతే మళ్లీ ప్రైవేట్ కంప్లైంట్ వేస్తా’ అని ఆమె అన్నారు.

మరోవైపు, సాయి కృష్ణ కేసును సీబీఐతో విచారించాలని వైసీపీ నేత, మాజీ మంత్రి అంబటి రాంబాబు వేసిన పిటిషన్ను హైకోర్టు కొట్టేసింది. హెబియస్ కార్పస్ పిటిషన్ పెండింగ్లో ఉండడంతో ఈ పిటిషన్ను కొట్టివేసినట్లు తెలిపింది.