సర్దార్ సర్వాయి పాపన్న AI యానిమేషన్ సినిమా పోస్టర్ లాంచ్, వచ్చేవారం విడుదల

చారిత్రక వ్యక్తి సర్దార్ సర్వాయి పాపన్న జీవితం ఆధారంగా రూపొందిన AI యానిమేషన్ చిత్రం పోస్టర్ లాంచ్ ఈరోజు జరిగింది. ఈ చిత్రాన్ని వచ్చే వారం ఏపీ, తెలంగాణ రాష్ట్రాల్లో విడుదల చేయనున్నట్లు చిత్ర బృందం ప్రకటించింది.

ఈ చిత్రాన్ని వెంకటేష్ నిర్మించి దర్శకత్వం వహించారు. నమస్తేజ మూవీ మేకర్ బ్యానర్ పై తీసిన ఈ సినిమా పూర్తి AI యానిమేషన్ లో రూపొందింది. సెన్సార్ పూర్తై UA సర్టిఫికెట్ పొందింది. తొలుత ఈ నెల 7న విడుదల చేయాలని భావించగా థియేటర్ల లభ్యత కారణంగా 14 లేదా 21 తేదీల్లో విడుదల చేస్తామని నిర్మాతలు తెలిపారు.

సర్దార్ సర్వాయి పాపన్న 360 ఏళ్ల క్రితం గోల్కొండ రాజ్యానికి వ్యతిరేకంగా పోరాడిన చారిత్రక వ్యక్తి. అన్ని కులాల ప్రజలను ఏకం చేసి, కోటలు స్వాధీనం చేసుకుని ప్రజలపై పన్నుల భారం తగ్గించిన వ్యక్తిగా చరిత్రలో నిలిచారు. ఈ చిత్రం ఆయన పోరాట పటిమను కళ్లకు కట్టేలా చూపిస్తుందని చిత్ర బృందం తెలిపింది. గతంలో 2002 లో ఇదే కథతో కృష్ణ, సుమన్ నటించిన ‘సర్దార్ పాపన్న’ సినిమా వచ్చింది. తాజా చిత్రాన్ని కొత్త సాంకేతికతతో AI యానిమేషన్ లో తీర్చిదిద్దారు.

రచయిత, నిర్మాత దీపక్ జ్ఞాతి మాట్లాడుతూ, సర్దార్ సర్వాయి పాపన్న చరిత్రను మరుగున పడేసిన పరిస్థితిలో దాన్ని వెలికి తీయడమే లక్ష్యంగా ఈ చిత్రం తీసినట్లు చెప్పారు. సినిమాతో పాటు ఒక పుస్తకం కూడా ముద్రించారు. ఆర్కే ఫిల్మ్స్ ఈ చిత్రాన్ని ఏపీ, తెలంగాణలో విడుదల చేస్తోంది. త్వరలో మరిన్ని ప్రచార కార్యక్రమాలు చేపట్టనున్నట్లు చిత్ర బృందం తెలిపింది.