వరంగల్‌ భద్రకాళి ఆలయంలో శాకాంబరి నవరాత్రి ఉత్సవాలు ప్రారంభం

వరంగల్‌లోని భద్రకాళి అమ్మవారి దేవాలయంలో ఆషాఢ మాస శాకాంబరి నవరాత్రి మహోత్సవాలు ప్రారంభమయ్యాయి. స్థానిక ఎమ్మెల్యే నాయిని రాజేందర్ రెడ్డి, ఆయన సతీమణి కలిసి జ్యోతి ప్రజ్వలన చేసి ఉత్సవాలను ప్రారంభించారు. మొదటి రోజు సహస్ర కలశాభిషేకం నిర్వహించారు.

ఈ ఉత్సవాలు 15 రోజుల పాటు కొనసాగుతాయి. ఈ కాలంలో అమ్మవారిని ప్రతిరోజు ఒక ప్రత్యేక రూపంలో అలంకరిస్తారు. చివరి రోజైన గురు పౌర్ణమి నాడు సంపూర్ణ శాకాంబరి అలంకారంలో భక్తులకు దర్శనం లభిస్తుందని ఆలయ వర్గాలు తెలిపాయి.

భక్తుల సౌకర్యం కోసం ప్రత్యేక క్యూ లైన్లు, శీఘ్ర దర్శనం, వృద్ధులు, చిన్నపిల్లలకు ప్రత్యేక వరుసలు ఏర్పాటు చేశారు. వర్షం, ఎండ నుంచి రక్షణగా టెంట్లు, పందిళ్లు వేశారు. తాగునీటి సదుపాయం కూడా కల్పించారు. ఆలయ నిర్మాణ పనులు జరుగుతున్నందున కొన్ని తాత్కాలిక నిర్మాణాలు తొలగించినట్లు, భక్తులు సహకరించాలని ఆలయ ఈఓ కోరారు.

ప్రధాన అర్చకులు వివరిస్తూ, కరువు, కాటకాలు రాకుండా, పంటలు బాగా పండేలా, ప్రజలకు ఆరోగ్యం, ఐశ్వర్యం, శాంతి కలగాలని ఈ ఉత్సవాలు నిర్వహిస్తున్నామని తెలిపారు. ప్రతి రోజు ఒక దేవతా రూపంలో అమ్మవారు ప్రత్యేకమైన అనుగ్రహం అందిస్తారని చెప్పారు.