తాళ్లపాకలో శివకేశవుల దివ్య కల్యాణ మహోత్సవం ఘనంగా నిర్వహణ

ప్రాచీన తాళ్లపాక గ్రామంలో వార్షిక బ్రహ్మోత్సవాలలో భాగంగా శివకేశవుల దివ్య కల్యాణ మహోత్సవం ఘనంగా నిర్వహించారు.

కడప జిల్లాలోని తాళ్లపాక, ప్రముఖ వాగ్గేయకారుడు తాళ్లపాక అన్నమాచార్యుల జన్మస్థలం. ఇక్కడ సిద్ధేశ్వర స్వామి, చెన్నకేశవ స్వామి అనే రెండు ప్రాచీన దేవాలయాలు ఉన్నాయి. ప్రతి ఏటా బ్రహ్మోత్సవాల సమయంలో శివుడు (సిద్ధేశ్వర స్వామి, కామాక్షీ సమేతంగా), కేశవుడు (శ్రీదేవి, భూదేవి సమేత చెన్నకేశవ స్వామి) ల కల్యాణం జరుగుతుంది.

ఈ ఏడాది కూడా తిరుమల తిరుపతి దేవస్థానం వేద పండితులు వేద మంత్రాలతో, మంగళ వాయిద్యాలతో శాస్త్రోక్తంగా కల్యాణం జరిపించారు. స్వామివారి మూర్తులను పట్టువస్త్రాలు, స్వర్ణాభరణాలు, వివిధ రంగుల పుష్పాలతో అలంకరించారు.

కల్యాణం అనంతరం సిద్ధేశ్వర స్వామి, చెన్నకేశవ స్వామి ఇద్దరూ ఒకే వేదికపై నుండి గజ వాహనంపై ఊరేగింపుగా మాడ వీధుల్లో భక్తులకు దర్శనమిచ్చారు.

అన్నమాచార్య ప్రాజెక్టు కళాకారులు అన్నమాచార్య కీర్తనలు ఆలపించారు. భక్తులు భారీ సంఖ్యలో పాల్గొని ఈ కల్యాణాన్ని తిలకించారు.