రంగారెడ్డిలో 6 ఏళ్ల మనవరాలికి SI కారు నేర్పిన ఘటన వైరల్

రంగారెడ్డి జిల్లాలో ఒక సబ్‌-ఇన్‌స్పెక్టర్ (SI) తన 6 ఏళ్ల మనవరాలికి కారు నడపడం నేర్పించారు. బైరాగిగూడ నుంచి గంధంగూడ వెళ్లే ప్రధాన రహదారిపై ఈ ఘటన చోటు చేసుకుంది.

ప్రత్యక్ష సాక్షుల ప్రకారం, డ్రైవింగ్ సీట్లో చిన్నారి కూర్చుని స్టీరింగ్ పట్టుకోగా, పక్కనే ఆమె తాతయ్య (SI) కూర్చున్నారు. కారు నెమ్మదిగా అస్తవ్యస్తంగా కదులుతూ ట్రాఫిక్ జామ్‌కు కారణమైంది.

రహదారిపైనే చిన్నారికి కారు నేర్పడాన్ని గమనించిన స్థానికులు వారిని నిలదీశారు. ఆ సమయంలో ఆ పిల్ల ‘మా తాత పోలీస్’ అని సమాధానం ఇచ్చినట్టు వీడియోలో ఉంది. SI మాత్రం కారు దిగకుండా, ఇది ఆటో గేర్ కారు అని, తనకు పూర్తి నియంత్రణ ఉందని వాదించారు.

స్థానికుల అభ్యంతరాలు పట్టించుకోకుండా SI వెళ్లిపోయారు. అనంతరం ఈ దృశ్యాలు సోషల్ మీడియాలో వైరల్ అయ్యాయి. మైనర్లతో వాహనాలు నడిపించడం చట్ట విరుద్ధం. ఈ ఘటనపై సీనియర్ పోలీసు అధికారుల స్పందన తెలియాల్సి ఉంది.