తనకు ఇంజనీరింగ్ సీటు ఇప్పించిన హరీష్‌రావుకు సాఫ్ట్‌వేర్ ఉద్యోగి రోహిత్ రూ.6 లక్షల విరాళం

సిద్దిపేటకు చెందిన రోహిత్ అనే యువకుడు, తనకు ఇంజనీరింగ్ సీటు ఇప్పించిన మాజీ మంత్రి హరీష్ రావుకు కృతజ్ఞతగా తన వార్షిక వేతనంలో సగం (రూ.6 లక్షలు) విరాళంగా సమర్పించాడు. ఇవాళ ఎమ్మెల్యే క్యాంపు కార్యాలయంలో హరీష్ రావును కలిసి ఆయనకు ఈ విరాళం అందజేశాడు.

రోహిత్ ఇంటర్ పూర్తయ్యాక హైదరాబాద్‌లోని ఒక ఇంజనీరింగ్ కాలేజీలో సీటు కోసం హరీష్ రావు సహాయం కోరాడు. హరీష్ రావు వెంటనే స్పందించి, అతను కోరుకున్న కాలేజీలో సీటు ఇప్పించి విద్యకు సహకరించారు.

ఇటీవల ఇంజనీరింగ్ పూర్తి చేసిన రోహిత్, 'లీగల్ రక్షణ' అనే సంస్థలో ఏటా రూ.12 లక్షల వేతనంతో సాఫ్ట్‌వేర్ ఉద్యోగం పొందాడు. తన ఉద్యోగం వల్ల వచ్చే ఆదాయంలో సగం భాగాన్ని సమాజ సేవకు వినియోగించాలని నిర్ణయించినట్లు తెలిపాడు.

హరీష్ రావు రోహిత్ నిర్ణయాన్ని ప్రశంసించారు. "ఇలాంటి స్వచ్ఛంద సేవా నిర్ణయం నేటితరం ఉద్యోగులకు ఆదర్శం" అని వ్యాఖ్యానించారు. రోహిత్ తల్లిదండ్రులు శ్రీనివాస్ దంపతులను కూడా అభినందించారు.