సింగూరు ప్రాజెక్టులో నీటిమట్టం పడిపోవడంతో సంగారెడ్డి బ్రూవరీలకు నీటి కొరత

సంగారెడ్డి జిల్లాలోని సింగూరు ప్రాజెక్టులో నీటిమట్టం డెడ్ స్టోరేజ్‌కు దగ్గరగా ఉంది. దీంతో సంగారెడ్డి పరిసరాల్లోని బ్రూవరీలకు మంజీరా నీటి సరఫరా నిలిచిపోయింది.

HMWSSB అధికారులు సంగారెడ్డి పట్టణ పరిసరాల్లోని బీర్ కంపెనీలకు మంజీరా నీటి సరఫరాను నిలిపివేశారు. El Nino ప్రభావంతో వర్షాలు తగ్గడంతో మంజీరా నీటికి కొరత ఏర్పడింది. దీంతో పలు కంపెనీలు బీర్ తయారీకి భూగర్భ జలాలపై ఆధారపడుతున్నాయి. భూగర్భ జలమట్టాలు పడిపోవడంతో ఫార్మాస్యూటికల్ కంపెనీలు కూడా ప్రత్యామ్నాయ మార్గాలను వెతుకుతున్నాయి.

మంజీరా నీరు బీరుకు రుచిని ఇస్తుంది. ఈ కొరత వల్ల తెలంగాణలో బీర్ల రుచి మారనున్నట్టు తెలుస్తోంది. ఏడాది పొడవునా సింగూరు నుంచి నీటిని వాడుకున్న బ్రూవరీలు ఇప్పుడు ఆ స్థితిలో లేవు.

సింగూరు ప్రాజెక్టు పూర్తి నీటి నిల్వ సామర్థ్యం 29.917 టీఎంసీలు. ప్రస్తుతం అందులో 3.341 టీఎంసీల నీరే ఉంది. ఈ ప్రాజెక్టు ఉమ్మడి మెదక్, నిజామాబాద్ జిల్లాలకు, హైదరాబాద్, సికింద్రాబాద్‌లకు తాగునీరు అందిస్తుంది. దీంతో తాగునీటి ఇబ్బందులు తప్పే అవకాశం లేదు.

గత ఏడాది మంజీరా పరివాహక ప్రాంతంలో భారీ వర్షాలు కురిశాయి. కర్ణాటక నుంచి వరద రావడంతో సింగూరులోకి 20 టీఎంసీలకు పైగా నీరు చేరింది. కానీ డ్యామ్‌లో భద్రతా లోపాలు, అప్‌స్ట్రీమ్ స్లోప్ పేవ్‌మెంట్ దెబ్బతినడంతో నేషనల్ డ్యామ్ సేఫ్టీ అథారిటీ మరమ్మతులు చేపట్టాలని సూచించింది. పనులకు ఆటంకం రాకుండా అధికారులు నిల్వ ఉన్న నీటిని దిగువకు వదిలారు. దీంతో సింగూరులో నీటి నిల్వ కనిష్ట స్థాయికి చేరుకుంది.