SIR జనగణనతో మున్సిపల్ కార్పొరేషన్ల ఆదాయం తగ్గుదల

తెలంగాణ రాష్ట్రంలో SIR జనగణన, ఓటర్ల జాబితా సవరణ ప్రక్రియ కారణంగా మున్సిపల్ కార్పొరేషన్ల ఆదాయం భారీగా తగ్గింది. GHMC, సైబరాబాద్, మల్కాజగిరి కార్పొరేషన్ల యంత్రాంగం గత నెలలుగా ఈ పనుల్లో నిమగ్నమైంది.

ఆస్తి పన్ను వసూళ్లు పూర్తిగా మందగించాయి. బిల్ కలెక్టర్లు, టాక్స్ ఇన్స్పెక్టర్లు, డిప్యూటీ జోనల్ కమిషనర్లు ఉదయం నుంచి సాయంత్రం వరకు SIR ప్రక్రియపైనే పనిచేస్తున్నారు. GHMC పరిధిలో 70% ఆదాయం కుంటుపడిందని అధికార వర్గాలు తెలిపాయి.

మూడు కార్పొరేషన్ల నిత్య కార్యకలాపాలకు 275 నుంచి 325 కోట్లకు పైగా ఖర్చవుతుంది. పన్నులు వసూలు కాకపోవడంతో ఆ భారం కార్పొరేషన్ ఖజానాలపై పడుతోందని ఆర్థిక విభాగం అధికారులు చెప్తున్నారు. ఇదే పరిస్థితి మరో రెండు నెలలు కొనసాగితే ఆదాయం మరింత తగ్గుతుందని అంచనా.

పౌర ఫిర్యాదులు, వివిధ సేవలు ఆలస్యం అవుతున్నాయి. ఆదాయం పెంచే ప్రత్యామ్నాయ మార్గాల వైపు అధికారులు చూస్తున్నారు. ఇది ఎంతమేర ఫలిస్తుందో వేచి చూడాలి.