అధిక దిగుబడి కోసం జొన్న సాగు మెళకువలు.. పాలెం శాస్త్రవేత్త కీలక సూచనలు

ఖరీఫ్ సీజన్‌లో వర్షాధార పంటగా సాగయ్యే జొన్నకు ఆరోగ్య ఉత్పత్తుల డిమాండ్ పెరిగింది. కానీ వర్షాలు ఆలస్యమవడంతో చాలామంది రైతులు ఇప్పుడిప్పుడే విత్తుతున్నారు. ఈ నేపథ్యంలో తక్కువ కాలంలో అధిక దిగుబడి ఇచ్చే రకాలు, సాగు పద్ధతులపై పాలెం ప్రాంతీయ వ్యవసాయ పరిశోధనా స్థానం శాస్త్రవేత్త డాక్టర్ మహేశ్వరమ్మ రైతులకు మార్గదర్శకాలు అందించారు.

నేల తయారీ, ఎరువులు: జొన్నను తేలిక లేదా బరువు నేలల్లో పండించవచ్చు. మంచి నీటి పారుదల, తటస్థ నేలలు అవసరం. ఒక ఎకరాకు 3-4 టన్నుల పశువుల ఎరువు వేసి, లోతుగా 2-3 సార్లు దున్నాలి. ఆఖరి దుక్కిలో 24 కిలోల నత్రజని, 48 కిలోల భాస్వరం, 16 కిలోల పొటాష్ ఎరువులను వేసుకోవాలి.

విత్తనం, నాట్లు: సాధారణంగా ఎకరాకు 3 కిలోల విత్తనం సరిపోతుంది. వర్షాలు ఆలస్యమైతే 4 కిలోలకు పెంచాలి. Imidacloprid 7 ml/kg లేదా Thiram/Captan పొడి మందుతో విత్తన శుద్ధి చేసుకోవాలి. 45 సెం.మీ. వరుస, 10-15 సెం.మీ. మొక్కల ఎడంతో విత్తితే ఎకరాకు 68-72 వేల మొక్కలు వస్తాయి. విత్తిన 48 గంటల్లో Atrazine 600 g/200 L నీటితో కలుపు నివారణ చేయాలి.

అధిక దిగుబడి రకాలు: పాలెం పచ్చజొన్న-1 (95-105 రోజులు, 8-10 qtl/ఎకరా), తెలంగాణ జొన్న-1/CSV-41, పాలమూరు జొన్న/CSV-31, పాలెం జొన్న/PSV-512 లాంటి రకాలు పాలెం కేంద్రంలో అందుబాటులో ఉన్నాయి. ఇవి ఎకరాకు 12-13 క్వింటాళ్ల ధాన్యం, 20-25 క్వింటాళ్ల పశుగ్రాసం ఇస్తాయి.

చీడపీడలు, నివారణ: 35-45 రోజుల తర్వాత మొవ్వు చంపు ఈగ ఆశిస్తే Cypermethrin 3 ml/L పిచికారి చేయాలి. 45 రోజులు దాటాక కాండం తొలుచు పురుగు రాకుండా Carbofuran 3G గుళికలు (4-5 kg/ఎకరా) కాండపు సుడుల్లో వేయాలి. యూరియా 30 కిలోలు 35-45 రోజుల మధ్య టాప్ డ్రెస్సింగ్ చేయాలి. నీరు అందుబాటులో ఉంటే పుష్పించే, గింజ పట్టే, గింజ నిండే దశల్లో నీటి తడులు ఇవ్వాలి.

తెగుళ్లు, కోత: ఎడతెరపి లేని వర్షాల్లో గింజబూజు రాకుండా Propiconazole 1 ml/L పిచికారి చేయాలి. నల్లకాండం తెగులుకు బెట్ట పరిస్థితి రాకుండా చూడాలి. 15% తేమ వద్ద కోత కోసి, 8-10% తేమకు ఎండబెట్టి నిల్వ చేస్తే ఎక్కువ కాలం నిల్వ ఉంటుంది.