దేశవ్యాప్తంగా నైరుతి రుతుపవనాలు విస్తరణ, పలు రాష్ట్రాల్లో భారీ వర్షాలు

నైరుతి రుతుపవనాలు దేశవ్యాప్తంగా విస్తరించడంతో పలు రాష్ట్రాల్లో భారీ వర్షాలు కురుస్తున్నాయి. రోడ్లు జలమయం కావడం, కొండచరియలు విరిగిపడడం, పాఠశాలలు మూసివేయడం వంటి పరిస్థితులు నెలకొన్నాయి. నదులు పొంగడంతో రవాణాకు తీవ్ర అంతరాయం ఏర్పడి జనజీవనం అస్తవ్యస్తమైంది.

భారత వాతావరణ శాఖ (IMD) పలు రాష్ట్రాలకు కీలక హెచ్చరికలు జారీ చేసింది. ఉత్తరాదిన ఒక్కరోజే 10 మంది వర్ష ప్రమాదాల్లో మరణించారు. గుజరాత్ లోని సూరత్ జిల్లాలో గత కొన్ని రోజులుగా కురిసిన భారీ వర్షాలకు ఇప్పటివరకు 17 మంది చనిపోయారు. ఢిల్లీలో 160 మిల్లీమీటర్లకు పైగా వర్షపాతం నమోదై, పలు ప్రాంతాలు జలమయమయ్యాయి, చెట్లు కూలి భారీ ట్రాఫిక్ జామ్‌లు ఏర్పడ్డాయి. నగరంలో ఎల్లో అలర్ట్ కొనసాగుతోంది. ఈరోజు కూడా ఉరుములు, మెరుపులతో కూడిన మోస్తరు వర్షం, గంటకు 30-40 కిమీ వేగంతో ఈదురు గాలులు వీచే అవకాశం ఉందని IMD అంచనా వేసింది.

ఉత్తరాఖండ్ లో అక్కడక్కడా అతి భారీ వర్షాలు కురిసే అవకాశం ఉంది. అలకనంద, మందాకిని నదులు ఉధృతంగా ప్రవహిస్తుండగా అధికారులు నీటి మట్టాలను పర్యవేక్షిస్తున్నారు. రుద్రప్రయాగ్ జిల్లాలో పాఠశాలలు మూసివేశారు. ఉత్తరకాశీ జిల్లాలో కొండచరియ విరిగిపడి గంగోత్రి హైవే మూసుకుపోయింది, చార్ధాం యాత్రకు అంతరాయం ఏర్పడింది. హిమాచల్ ప్రదేశ్ లో 75 రోడ్లు మూసుకుపోగా 29 విద్యుత్ ట్రాన్స్‌ఫార్మర్లు దెబ్బతిన్నాయి.

ఉత్తరప్రదేశ్ లోని కొన్ని ప్రాంతాలకు IMD రెడ్ అలర్ట్ జారీ చేసింది. జులై 11 వరకు వర్షాలు కొనసాగే అవకాశం, 2-4°C మేర ఉష్ణోగ్రతలు తగ్గే అవకాశం ఉంది. గజియాబాద్, మీరట్, హాపూర్, బులంద్ షహర్ తదితర జిల్లాల్లో పాఠశాలలు మూసివేశారు. ప్రయాగరాజ్ లో వరద నివారణ సన్నాహాలు ముమ్మరం చేశారు.

గుజరాత్ లో 24 గంటల్లో 358 మి.మీ. వర్షం కురిసి, సూరత్ నగరం నెమ్మదిగా కోలుకుంటోంది. ముఖ్యమంత్రి భూపేంద్ర పటేల్ ప్రభావిత ప్రాంతాలను సందర్శించి, దీర్ఘకాలిక పరిష్కారాలకు అధికారులను ఆదేశించారు. కేరళలోని వైనాడులో కొండచరియ విరిగిపడి ఆరుగురు మరణించిన ఘటన తర్వాత, గల్లంతైన ఇద్దరి కోసం జాగిలాల సహాయంతో సహాయక బృందాలు గాలింపు కొనసాగిస్తున్నాయి.