94 ఏళ్ల సీనియర్ నటి షావుకారు జానకి చెన్నై ఆసుపత్రిలో కన్నుమూత

సీనియర్ నటి షావుకారు జానకి (94) చెన్నైలోని కావేరి ఆసుపత్రిలో మరణించారు. గత వారం రోజులుగా ఆమె అక్కడ చికిత్స పొందుతున్నారు. మరణ వార్తను నటుడు లాజర్ తెలిపారు.

ఆమె అసలు పేరు టేకుమల్ల జానకి. 1931 డిసెంబర్ 12న కాకినాడ సమీపంలోని పెద్దాపురంలో జన్మించారు. ప్రముఖ నటి కృష్ణకుమారి ఆమె స్వంత చెల్లెలు. ఇద్దరూ కూచిపూడి నాట్యం నేర్చుకున్నారు.

జానకి రేడియో నాటకాల్లో నటించేవారు. ఆ సమయంలో చిత్ర దర్శకుడు బీఎన్ రెడ్డి దృష్టిలో పడ్డారు. 'స్వర్గసీమ' సినిమాలో అవకాశం వచ్చింది. కానీ ఇంట్లో ఒప్పుకోలేదు. తర్వాత పెళ్లి అయింది. భర్తతో కలిసి మద్రాసు చేరుకున్నారు.

బీఎన్ రెడ్డి సూచనతో నాగిరెడ్డి, చక్రపాణిలను కలిశారు. 'షావుకారు' చిత్రంలో కథానాయకిగా అవకాశం లభించింది. ఆ సినిమా పేరే ఆమె ఇంటి పేరుగా మారింది.

సుమారు 77 ఏళ్ల సినీ జీవితంలో 400కు పైగా చిత్రాల్లో నటించారు. తెలుగు, తమిళం, కన్నడ, మలయాళం, హిందీ భాషల్లో విభిన్న పాత్రలు పోషించారు. పద్మశ్రీ అవార్డు గ్రహీత అయిన జానకి 'సంసారం ఒక చతురంగం' చిత్రంలో చిలకమ్మ పాత్రలో నటించారు. 'చిలకమ్మ మజాకా' అనే డైలాగ్తో ప్రేక్షకులకు దగ్గరయ్యారు.