శ్రీచక్రం అంటే శివశక్తుల కలయికే: మల్లాప్రగడ శ్రీమన్నారాయణమూర్తి వివరణ

శ్రీచక్రం అంటే శివుడు, శక్తి కలిసిన రూపమని ఆధ్యాత్మిక ప్రవచనకర్త మల్లాప్రగడ శ్రీమన్నారాయణమూర్తి వివరించారు. అంతేకాకుండా సమస్త సృష్టి కూడా శ్రీచక్రమేనని ఆయన అన్నారు.

తొమ్మిది మూల ప్రకృతులు కలిసి శ్రీచక్రంగా ఏర్పడతాయని ఆయన తెలిపారు. ఈ తొమ్మిది కలిసినప్పుడే సృష్టి ఏర్పడుతుందని అన్నారు. శ్రీచక్రం సాధకుని దివ్యదేహానికి కూడా ప్రతీక అని వివరించారు.

అమ్మవారి నివాసస్థానం మణిద్వీపంలో ఉంటుందని, అక్కడి కోణాలు, ప్రాకారాలను దాటుకుంటూ వెళ్లే వివరాలను నవావరణ అంటారని ఆయన చెప్పారు. ఈ విశేషాలను ముత్తుస్వామి దీక్షితులు నవావరణ కీర్తనల్లో వర్ణించారని పేర్కొన్నారు.

శ్రీచక్ర ఆరాధన వల్ల అమ్మవారిని సాక్షాత్తు ఆరాధించినట్లు అవుతుందని, తన లోపలి దైవాన్ని దర్శించే జ్ఞానం కూడా సిద్ధిస్తుందని ఆయన అన్నారు. సౌందర్య లహరి, లలితా సహస్రనామంలో శివుడిని కామేశ్వరుడుగా, పార్వతిని లలితగా పేర్కొన్నారని తెలిపారు. శ్రీచక్రాన్ని మేరు ప్రస్తరం రూపంలో, రేఖాత్మకంగా రెండు రకాలుగా అర్చనలో వినియోగిస్తారని ఆయన చెప్పారు.