ఖమ్మం జిల్లా పల్లిపాడులో శృంగేరి పీఠాధిపతి పర్యటన

శృంగేరి శారదా పీఠం పీఠాధిపతి విధుశేఖర భారతీ మహాస్వామీజీ ఖమ్మం జిల్లా కొణిజర్ల మండలం పల్లిపాడు గ్రామాన్ని సందర్శించారు. వేద పండితులు, భక్తులు ఆయనకు మంగళ వాయిద్యాలతో పూర్ణకుంభ స్వాగతం పలికారు.

పర్యటనలో భాగంగా శ్రీ చక్ర ఫిల్లింగ్ స్టేషన్ యాజమాన్యం ఏర్పాటు చేసిన గోసేవ పూజలో మహాస్వామీజీ పాల్గొన్నారు. పర్యావరణ పరిరక్షణను కాంక్షిస్తూ ఆలయ ప్రాంగణంలో స్వామీజీ స్వయంగా మొక్కలు నాటారు.

అనంతరం భక్తులను ఉద్దేశించి ఆయన అనుగ్రహ భాషణ చేశారు. సమాజంలో దైవభక్తిని పెంపొందించుకోవాలని, సనాతన సంప్రదాయాల పరిరక్షణ ప్రతి ఒక్కరి బాధ్యత అని సూచించారు.