పారితోషకం పెంపు వార్తలపై నటి శ్రీనిధి శెట్టి స్పందన: రూమర్లు నిరాధారం

నటి శ్రీనిధి శెట్టి తన పారితోషకంపై వచ్చిన వార్తలను ఖండించారు. ఒక్కో సినిమాకు రూ.7 నుంచి రూ.8 కోట్లు డిమాండ్ చేస్తున్నారన్న ప్రచారం నిరాధారమని ఆమె స్పష్టం చేశారు.

కేజీఎఫ్ చాప్టర్ 1, చాప్టర్ 2 చిత్రాలతో దేశవ్యాప్తంగా గుర్తింపు పొందిన శ్రీనిధి గురించి ఈ రూమర్లు సోషల్ మీడియాలో ప్రచారంలో ఉన్నాయి. ఈ వార్తల్లో నిజం లేదని ఆమె అన్నారు. ఇప్పటివరకు తాను కొన్ని సినిమాలే చేశానని, అలాంటప్పుడు అంత పెద్ద పారితోషకం ఎలా డిమాండ్ చేస్తానని ప్రశ్నించారు.

డబ్బే లక్ష్యమైతే కేజీఎఫ్ విజయం తర్వాత వచ్చిన ప్రతి సినిమాను ఒప్పుకుని 20కి పైగా చిత్రాలు పూర్తి చేసేదాన్నని ఆమె వివరించారు. పారితోషకం కంటే నటిగా బలమైన పాత్రలు, ప్రేక్షకుల మెప్పు తనకు ముఖ్యమని చెప్పారు. తక్కువ పారితోషకం లభించినా మంచి కథ, పాత్ర ప్రాధాన్యం ఉన్న ప్రాజెక్టులనే ఎంచుకుంటానని పేర్కొన్నారు.

ప్రస్తుతం శ్రీనిధి నటుడు వెంకటేష్ సరసన "ఆదర్శ కుటుంబం" చిత్రంలో నటిస్తున్నారు. ఈ చిత్రం షూటింగ్ పూర్తయింది. విడుదలకు సిద్ధంగా ఉన్నా కొన్ని కారణాల వల్ల ఆలస్యమైంది. త్వరలోనే చిత్ర యూనిట్ కొత్త విడుదల తేదీని అధికారికంగా ప్రకటించనుంది.