ఒత్తిడి వల్ల శరీరంలో కలిగే మార్పులు: వైద్యుల వివరణ

మానసిక ఒత్తిడి శరీరంపై పలు ప్రతికూల ప్రభావాలు చూపుతుందని వైద్యులు హెచ్చరిస్తున్నారు. ఒత్తిడి ఎక్కువైతే శరీరంలో కార్టిసోల్ అనే హార్మోన్ విడుదల పెరుగుతుంది. దీనివల్ల జుట్టు రాలడం, పొట్ట చుట్టూ కొవ్వు చేరడం, గుండె సమస్యలు వంటి ఇబ్బందులు తలెత్తవచ్చు.

దీర్ఘకాలిక ఒత్తిడి వల్ల అధిక రక్తపోటు, గుండెపోటు, పక్షవాతం (స్ట్రోక్) సంభవించవచ్చు. జీర్ణ సంబంధ సమస్యలు, కండరాల నొప్పులు, కీళ్ల నొప్పులు కూడా రావచ్చు. మానసికంగా ఏకాగ్రత లోపం, చిరాకు, కోపం పెరుగుతాయి. నిద్రలేమి, అసంపూర్ణ నిద్ర వంటి సమస్యలూ కనిపిస్తాయి.

చాలా మంది ఈ ఒత్తిడిని తట్టుకోలేక ధూమపానం, మద్యపానం లేదా మాదకద్రవ్యాలకు అలవాటు పడతారు. ఒత్తిడి తీవ్రంగా ఉండి రోజువారీ కార్యకలాపాలు దెబ్బతింటున్నప్పుడు తప్పనిసరిగా వైద్యుడిని సంప్రదించాలి.

ఒత్తిడి తగ్గించుకోవడానికి నిపుణులు కొన్ని సూచనలు ఇస్తారు. రోజూ నడక, స్విమ్మింగ్, సైక్లింగ్ వంటి వ్యాయామం చేయాలి. పోషకమైన సమతుల ఆహారం తీసుకోవాలి. 6 నుంచి 8 గంటల మంచి నిద్ర పొందేలా చూసుకోవాలి.

మెడిటేషన్, యోగా, ధ్యానం ద్వారా మానసిక ప్రశాంతత సాధించవచ్చు. స్క్రీన్ టైమ్ తగ్గించడం, స్నేహితులతో సమయం గడపడం కూడా ఉపయోగపడుతుంది. అయినా ఒత్తిడి తగ్గకపోతే వైద్య సలహా తీసుకుని అవసరమైతే కౌన్సెలింగ్ లేదా మందులతో చికిత్స తీసుకోవచ్చు.