ఒక లీటర్ సాఫ్ట్ డ్రింక్‌లో ఎంత చక్కెర ఉంది? ఆరోగ్య ప్రభావాల వివరాలు

మార్కెట్లో లభించే సాఫ్ట్ డ్రింక్స్‌లో చక్కెర స్థాయిలను కంపెనీల వెబ్‌సైట్లలో ఇచ్చిన గణాంకాలు వెల్లడిస్తున్నాయి. ఒక లీటరు సాఫ్ట్ డ్రింక్‌లో 106 గ్రాముల చక్కెర ఉంటుంది. ఇది సుమారు 21 టీస్పూన్లకు సమానం.

100 మి.లీ.లో 10.6 గ్రాముల చక్కెర, 330 మి.లీ. బాటిల్‌లో 35 గ్రాముల (7 టీస్పూన్లు) చక్కెర ఉంటుందని ఆ గణాంకాలు చూపిస్తున్నాయి. ప్రపంచ ఆరోగ్య సంస్థ (WHO) ప్రకారం, ఆరోగ్యకరమైన వ్యక్తి రోజుకు 6 నుంచి 8 టీస్పూన్ల కంటే ఎక్కువ అదనపు చక్కెర తీసుకోకూడదు. ఒక చిన్న క్యాన్ డ్రింక్‌తోనే ఆ పరిమితి దాటిపోతుంది.

సాఫ్ట్ డ్రింక్ తాగిన 10–20 నిమిషాల్లో రక్తంలో చక్కెర స్థాయిలు పెరిగిపోతాయి. దీన్ని నియంత్రించడానికి కాలేయం ఎక్కువ ఇన్సులిన్‌ను విడుదల చేస్తుంది. కాలక్రమేణా ఇది ఇన్సులిన్ రెసిస్టెన్స్‌కు దారితీసి, టైప్‌-2 డయాబెటిస్ ప్రమాదాన్ని పెంచుతుంది. అధిక చక్కెర వల్ల బరువు పెరగడం, పొట్ట చుట్టూ కొవ్వు చేరడం కూడా జరుగుతుంది.

ఈ పానీయాల్లో ఉండే ఫాస్ఫారిక్, కార్బోనిక్ ఆమ్లాలు పంటి ఎనామెల్‌ను దెబ్బతీసి దంత సమస్యలు కలిగిస్తాయి. ఫాస్ఫారిక్ ఆమ్లం కాల్షియం గ్రహింపును తగ్గించి ఎముకలు బలహీనపడేలా చేస్తుంది. ముఖ్యంగా పెరిగే వయసు పిల్లలకు ఇది హానికరం. అధిక చక్కెర రక్తపోటు, చెడు కొలెస్ట్రాల్‌ను పెంచి గుండె జబ్బుల ముప్పును పెంచుతుందని హార్వర్డ్ అధ్యయనాలు చెబుతున్నాయి.

వేసవిలో దాహాన్ని తీర్చడానికి సాఫ్ట్ డ్రింక్స్ కంటే కొబ్బరి నీళ్లు, మజ్జిగ, రాగి అంబలి, చక్కెర లేని తాజా పళ్ల రసాలు మంచివని ఆరోగ్య నిపుణులు సూచిస్తున్నారు.