చెరుకు సాగులో సస్యరక్షణ చర్యలు: జడ చుట్ల తర్వాత ఎరువులు వద్దు, పురుగుల నివారణకు సూచనలు

తెలుగు రాష్ట్రాల్లో చెరుకు పంట ప్రస్తుతం ఐదారు నెలల వయసులో ఉంది. చాలాచోట్ల జడ చుట్లు కడుతున్నారు. ఈ దశలో రైతులు ఎరువులు వేయడం మానేయాలని నిపుణులు సూచిస్తున్నారు. ఎరువులు వేస్తే పిలకలు వచ్చి రసం నాణ్యత తగ్గుతుందని, బెల్లం నల్లగా మారుతుందని హెచ్చరిస్తున్నారు.

కృష్ణా జిల్లా ఘంటసాల కృషి విజ్ఞాన కేంద్రం సమన్వయకర్త డాక్టర్ సుధారాణి ఈ సలహాలిచ్చారు. డిసెంబర్-జనవరిలో నాటిన చెరుకుకు 180 రోజులు నిండితే ఎరువులు అసలు అవసరం లేదని స్పష్టం చేశారు. జూన్-జూలై నాట్లు వేసిన పంటలో తొలిదశలో పీక పురుగు, కాండం తొలచు పురుగు ఉధృతి ఉంటుందని, వాటి నివారణకు కొరాజిన్ లేదా క్లోరాజిన్ లిప్రోల్ 60 మి.లీ ఎకరానికి పిచికారి చేయాలని తెలిపారు.

20-25 రోజుల లేత పంటలో మొక్కలు చనిపోతుంటే చెరుకు చెత్తతో కప్పడం (1.25 టన్నులు/హెక్టార్) పీక పురుగు ఉధృతిని తగ్గిస్తుందని సూచించారు. వేరు పురుగు సమస్య ఉన్న రైతులు వానాకాలంలో వేప నూనె 5 మి.లీ/లీటర్ నీటికి లేదా వేప కషాయం 5% పొలం చుట్టూ ఉన్న ఎత్తైన చెట్లపై పిచికారి చేసి గుడ్లు పెట్టకుండా నిరోధించాలన్నారు. గుడ్లు పెట్టిన తర్వాత కనిపిస్తే ఎసిఫెట్ 1.5 గ్రా/లీటర్ లేదా క్లోరోఫైరిఫోస్ 2.5 మి.లీ/లీటర్ పిచికారి, తీవ్రత ఎక్కువుంటే ఇమిడాక్లోప్రిడ్+ఫిప్రోరిల్ కలిపిన లెసెంట్ 200 గ్రా/ఎకరం వాడాలని చెప్పారు.

పొలుసు పురుగు నివారణకు ముందుగా ఇమిడాక్లోప్రిడ్ తో సెట్ ట్రీట్మెంట్ చేసుకోవాలని, జడకట్టుడు తర్వాత దిగువ ఆకులు తొలగించి క్లోరిఫైరిఫోస్ లేదా ఇమిడాక్లోప్రిడ్ 0.25 మి.లీ/లీటర్ లేదా ఎసిటామిప్రిడ్ 0.25 గ్రా/లీటర్ పిచికారి చేయాలని వివరించారు. తెల్లదోమ, దూదేకుల పురుగు ఎక్కువైతే నత్రజని ఎరువులు తగ్గించి ఇమిడాక్లోప్రిడ్ 0.25-0.5 మి.లీ/లీటర్ చల్లితే సరిపోతుందన్నారు. వడలు తెగులు రాకుండా మల్టీ కే, బ్లూ కాపర్ (3 గ్రా/లీటర్) మొక్క మొదట్లో పిచికారి చేసుకోవాలని సలహా ఇచ్చారు.

ఎలుకల బెడద నివారణకు బ్రోమోడిలెన్ టాక్సిన్ వాడాలని, 960 గ్రా నూకలు, 20 మి.లీ నూనె, 20 గ్రా బ్రోమోడిలెన్ కలిపి 10-15 గ్రాముల పొట్లాలను బొరియల్లో వేయాలని డాక్టర్ సుధారాణి వివరించారు. గ్రామంలోని రైతులందరూ సామూహికంగా ఈ చర్య చేపడితే ఫలితం మెరుగ్గా ఉంటుందని సూచించారు. రైతులు సూచించిన మోతాదుల్లో మాత్రమే పురుగు మందులు వాడాలని, తొడుగులు ధరించి జాగ్రత్తగా పిచికారి చేయాలని హెచ్చరించారు.