టాలీవుడ్ డ్యాన్సర్స్ అసోసియేషన్‌లో వివాదం: సుమలత ఉప ఎన్నికల ప్రకటన

టాలీవుడ్ డ్యాన్సర్స్ అసోసియేషన్‌లో వివాదం కొనసాగుతోంది. అసోసియేషన్ అధ్యక్షురాలు సుమలత 10 మంది సభ్యులకు ఉప ఎన్నికలు నిర్వహించేందుకు నిర్ణయం తీసుకున్నారు. ఈ మేరకు ఎన్నికల అధికారిగా సామ్రాట్ అశోక్‌ను నియమించి, ఎన్నికల షెడ్యూల్ విడుదల చేశారు.

గత డిసెంబర్‌లో ఎన్నికైన కమిటీలో సుమలతతో సహా 16 మంది సభ్యులు ఉన్నారు. అయితే వివాదాల కారణంగా సుమలత జనరల్ సెక్రటరీ, ట్రెజరర్‌ను సస్పెండ్ చేశారు. దీంతో మరో 8 మంది కమిటీ సభ్యులు రాజీనామా చేశారు. మొత్తం 10 మంది పదవులు ఖాళీ కావడంతో ఆ పోస్టులకు ఉప ఎన్నికలు నిర్వహించాలని సుమలత నిర్ణయించారు.

ఈ వివాదాన్ని పరిష్కరించేందుకు ఫిలిం ఫెడరేషన్ (24 క్రాఫ్ట్‌ల సంఘం) రంగంలోకి దిగింది. ఫెడరేషన్ నాయకులు ఇరువర్గాలతో విడివిడిగా, తర్వాత కలిపి చర్చలు జరిపారు. ఉప ఎన్నికలు వద్దని, సమస్యలను అంతర్గతంగా పరిష్కరించుకోవాలని సూచించారు. అసోసియేషన్ ఫెడరేషన్‌లో భాగమని, దాని నిర్ణయాలకు కట్టుబడాలని స్పష్టం చేశారు. కానీ సుమలత ఫెడరేషన్ సూచనలను పట్టించుకోకుండా, అదేరోజు బై ఎలక్షన్ నోటిఫికేషన్‌ను విడుదల చేశారు.

సస్పెండ్ అయిన జనరల్ సెక్రటరీ శ్రీనివాస్ మాట్లాడుతూ, సుమలతకు తమను సస్పెండ్ చేసే అధికారం లేదని, లేబర్ అధికారి కూడా ఇదే మాట చెప్పారని తెలిపారు. ఫెడరేషన్ నిర్వహించిన సమావేశంలో 19వ తేదీన జనరల్ బాడీ సమావేశం ఏర్పాటు చేయాలని, సభ్యుల నిర్ణయం ప్రకారం ముందుకెళ్లాలని నిర్ణయించారని, కానీ సుమలత దాన్ని తోసిపుచ్చి ఏకపక్షంగా ఉప ఎన్నికలు నిర్వహిస్తున్నారని విమర్శించారు. ఉప ఎన్నికల్లో ఎవరూ పాల్గొనబోరని, 150 మందికి పైగా సభ్యులు ఇప్పటికే వ్యతిరేకించారని చెప్పారు.

ఈ వివాదంలో జానీ మాస్టర్ వర్గం, శేఖర్ మాస్టర్ వర్గం మధ్య భేదాలున్నట్లు వార్తలు వచ్చాయి. కానీ సస్పెండ్ అయిన సభ్యులు తాము ఏ వర్గానికీ చెందినవాళ్లు కామని, కేవలం సభ్యుల సంక్షేమం కోసమే పనిచేస్తున్నామని స్పష్టం చేశారు. అసోసియేషన్ నిధుల దుర్వినియోగం, ఇతర రాష్ట్రాల నుంచి డ్యాన్సర్లను తీసుకురావడం వంటి ఆరోపణలు కూడా ఉన్నాయి.

ఫిలిం ఫెడరేషన్ ఈరోజు సాయంత్రం 4 గంటల వరకు ఈ వివాదంపై అధికారిక ప్రకటన చేసే అవకాశం ఉంది. 19వ తేదీన ఫెడరేషన్ ఆధ్వర్యంలో జరిగే జనరల్ బాడీ సమావేశం, సుమలత ప్రతిపాదించిన ఉప ఎన్నికలు ఈ వివాదం తీరుపై కీలకంగా మారనున్నాయి.