సూర్యుడి కర్కాటక సంక్రమణంతో మకర రాశి వారికి 30 రోజులు ఎలా ఉంటాయి, పరిహారాలు ఏంటి?

జ్యోతిష నిపుణులు మాచిరాజు కిరణ్ కుమార్ వివరణ ప్రకారం, జులై 16 రాత్రి 11:44 నిమిషాలకు సూర్యుడు మిధున రాశి నుంచి కర్కాటక రాశిలోకి ప్రవేశిస్తాడు. అక్కడ ఆగస్టు 17 ఉదయం 8:03 నిమిషాల వరకు కొనసాగుతాడు. ఈ కాలంలో సూర్యుడు మకర రాశి నుంచి ఏడో స్థానంలో సంచరిస్తాడు. ఏడో స్థానం సాధారణంగా అననుకూల ఫలితాలు ఇస్తుందని జ్యోతిషం చెబుతుంది.

ఈ 30 రోజుల్లో మకర రాశి వారి దాంపత్య జీవితంలో మొండితనం, సహకారం లోపించే అవకాశం ఉంటుందని కిరణ్ కుమార్ హెచ్చరిస్తున్నారు. సంతానంతో చిన్నపాటి ఇబ్బందులు ఎదురవ్వవచ్చు. ప్రయాణాల్లో ఆలస్యం, అధిక వ్యయం సంభవించవచ్చు. చిన్నచిన్న ఆరోగ్య సమస్యలు, మనశ్శాంతి లోపం కూడా ఉండవచ్చు. అయితే తగు జాగ్రత్తలు తీసుకుంటూ క్రమశిక్షణతో ఉంటే ప్రభావం తగ్గుతుందని సూచిస్తున్నారు.

పరిహారాలుగా ఆయన పలు చిట్కాలు చెప్పారు. స్నానపు నీటిలో ఎర్రటి పూల రేకులు వేసి “ఓం శ్రీ సూర్యాయ నమః” అని స్మరించుకోవాలి. రాగి చెంబులో నీళ్లు, ఎర్రపూలు, కుంకుమ అక్షింతలు, చందనం, మిరప విత్తనాలు వేసి తూర్పుకు తిరిగి “ఓం గృణి సూర్య ఆదిత్యోం” మంత్రాన్ని 12 సార్లు జపిస్తూ నీళ్లు మొక్కకు వదలాలి. ఇంట్లో తూర్పు వైపు కుంకుమ రాసిన 12 ఒత్తులు కలిపి దీపం వెలిగించాలి. ఆదివారాల్లో గోధుమ ఉత్పత్తులు దానం చేయడం, విష్ణు మంత్రాలు జపించడం, విష్ణు సంబంధ ఆలయాల్లో ప్రదక్షిణలు చేయడం కూడా మంచిదన్నారు. ఇవి సూర్యుడి ప్రతికూలతలను తగ్గించి అనుగ్రహం పెంచుతాయని పేర్కొన్నారు.