సూర్య కర్కాటక సంక్రమణం: మీనరాశి వారికి 30 రోజుల పాటు ఎలాంటి ఫలితాలు?

జూలై 16, 2025 రాత్రి 11:04 నిమిషాలకు సూర్యుడు మిధున రాశి నుంచి కర్కాటక రాశిలోకి ప్రవేశిస్తాడు. కర్కాటక సంక్రమణం కారణంగా మీన రాశి వారికి సూర్యుడు ఐదవ స్థానంలో సంచరిస్తాడు. జూలై 16 నుంచి ఆగస్టు 17 వరకు ఈ స్థితి కొనసాగుతుందని జ్యోతిష్యులు మాచిరాజు కిరణ్ కుమార్ తెలిపారు.

ఐదవ స్థానంలో సూర్యుడు ప్రతికూలంగా ఉండడం వల్ల మీన రాశి వారిలో మానసిక ఆందోళన, ఒత్తిడి పెరిగే అవకాశం ఉంది. నమ్మిన వారి నుంచి ద్రోహం ఎదురయ్యే ప్రమాదం ఉంటుంది. ఆర్థిక నష్టాలు, శత్రువుల వల్ల భయాందోళనలు కూడా కలగవచ్చు. ఈ సమయంలో సొంత నిర్ణయాలు కాకుండా, శ్రేయోభిలాషుల సలహాలు పాటించడం మంచిదని వారు సూచించారు.

ఈ ప్రతికూలతలను తగ్గించుకోవడానికి కొన్ని పరిహారాలు ఉన్నాయి. ఆదివారాల్లో ఎర్రటి పువ్వులు కలిపిన నీటితో స్నానం చేయడం, రాగి చెంబుతో సూర్యునికి అర్ఘ్యం ఇవ్వడం వంటివి చేయాలి. 12 ఒత్తులతో కుంకుమ రాసి ఒకే ఒత్తిగా చేసి తూర్పు దిక్కుగా దీపం వెలిగించడం కూడా ఉత్తమం. అలాగే ఆదివారం ఉపవాసం ఉండి, సాయంత్రం గోధుమ పదార్థాలు దానం చేయడం వల్ల సూర్యుని అనుగ్రహం లభిస్తుంది.

మంత్రాల విషయానికొస్తే, ‘ఓం నమో నారాయణాయ’ అష్టాక్షరి మంత్రాన్ని 21 సార్లు, ‘ఓం నమో భగవతే వాసుదేవాయ’ ద్వాదశాక్షరి మంత్రాన్ని 21 సార్లు జపించాలి. విష్ణు ఆలయాన్ని సందర్శించి, ధ్వజస్తంభం దగ్గర దీపం పెట్టడం, సరి సంఖ్యలో ప్రదక్షిణలు చేయడం కూడా లాభదాయకమని జ్యోతిష్యులు తెలిపారు. ఈ పరిహారాలు చేస్తే ప్రతికూల ఫలితాలు సానుకూలంగా మారే అవకాశం ఉంటుందని వారు చెప్పారు.