టీనేజ్ ప్రేమ వ్యవహారాలను POCSO కేసులుగా మార్చడంపై సుప్రీంకోర్టు కీలక వ్యాఖ్యలు

టీనేజ్ ప్రేమ వ్యవహారాలను POCSO కేసులుగా పరిగణించడం సరికాదని సుప్రీంకోర్టు అభిప్రాయపడింది. ప్రేమలో ఉన్న ఇద్దరు యువతీ యువకులు కలిసి వెళ్లిపోతే దాన్ని ప్రభుత్వం ఎలా అడ్డుకుంటుందని కోర్టు ప్రశ్నించింది.

15 నుంచి 18 ఏళ్ల వయసులో ఆకర్షణ, ప్రేమ, భావోద్వేగాలు సహజమేనని కోర్టు పేర్కొంది. లైంగిక దాడుల నుంచి పిల్లలను రక్షించేందుకు తీసుకొచ్చిన POCSO చట్టాన్ని పరస్పర అంగీకారంతో ఉన్న ప్రతి ప్రేమ వ్యవహారానికి వర్తింపజేయడం సరైన పద్ధతి కాదని కోర్టు అభిప్రాయపడింది.

కుటుంబ పరువు కోసం చాలా మంది తల్లిదండ్రులు POCSO కేసులు పెడుతున్నట్లు కోర్టు పేర్కొంది. చివరికి కోర్టులు నిందితులను నిర్దోషులుగా విడుదల చేస్తున్న ఉదాహరణలు ఉన్నాయని కూడా కోర్టు తెలిపింది. నిజమైన లైంగిక నేరాలు, పరస్పర సమ్మతితో ఉన్న టీనేజ్ సంబంధాల మధ్య తేడాను గుర్తించాల్సిన అవసరం ఉందని, ఇది POCSO చట్టాన్ని బలహీనపరచడం కాదని కోర్టు స్పష్టం చేసింది.