వివాహేతర సంబంధం అనుమానం ఉంటే భార్య హోటల్ రికార్డులు, కాల్ డేటా సేకరించవచ్చు: సుప్రీంకోర్టు

సుప్రీంకోర్టు వివాహేతర సంబంధాలపై తీర్పు ఇచ్చింది. ఈ తీర్పులో, వివాహేతర సంబంధం ఉన్న భాగస్వామికి వ్యక్తిగత గోప్యత హక్కు వర్తించదని స్పష్టం చేసింది.

జైపూర్‌కు చెందిన ఒక కేసులో, భర్తపై వివాహేతర సంబంధం ఆరోపణలు వచ్చాయి. భార్య, భర్త వివాహేతర సంబంధం నిరూపించడానికి హోటల్ రికార్డులు, కాల్ డేటా అందించాలని ఫ్యామిలీ కోర్టును ఆశ్రయించింది. జైపూర్ ఫ్యామిలీ కోర్టు భార్యకు అనుకూలంగా ఆదేశాలు జారీ చేసింది. దీనిని సవాల్ చేస్తూ భర్త సుప్రీంకోర్టును ఆశ్రయించారు.

భర్త తరపు న్యాయవాది, రాజ్యాంగంలోని Article 21 ప్రకారం వ్యక్తిగత గోప్యత హక్కు ఉందని, ఆ ఆధారాలు బయటపెట్టడం హక్కు ఉల్లంఘన అవుతుందని వాదించారు. అయితే, సుప్రీంకోర్టు ఈ వాదనను తోసిపుచ్చింది. Article 21 ఇచ్చే గోప్యత హక్కు సంపూర్ణమైనది కాదని, ప్రజా ప్రయోజనాలకు లోబడి ఉంటుందని పేర్కొంది. తప్పులను కప్పిపుచ్చుకోవడానికి ఈ హక్కును రక్షణ కవచంగా వాడుకోలేరని న్యాయస్థానం తేల్చింది.

ఈ తీర్పుతో, జైపూర్ ఫ్యామిలీ కోర్టు ఇచ్చిన ఆదేశాలను సుప్రీంకోర్టు సమర్థించింది. వివాహేతర సంబంధాన్ని నిరూపించేందుకు భార్య హోటల్ రికార్డులు, కాల్ డేటా వంటి ఆధారాలు సేకరించవచ్చని ఈ తీర్పు స్పష్టం చేస్తుంది.