TDP: ఎమ్మెల్యేలు లేని నియోజకవర్గాల్లో పార్టీ బలోపేతంపై దృష్టి

టీడీపీ తమకు ఎమ్మెల్యేలు లేని నియోజకవర్గాల్లో పార్టీని బలోపేతం చేయడంపై దృష్టి పెట్టింది. జనసేన, బీజేపీ ఎమ్మెల్యేలు ఉన్న స్థానాల్లోనూ సొంత పార్టీ నిర్మాణంపై దృష్టి సారించింది.

2024 ఎన్నికల్లో TDP 135, జనసేన 21, BJP 8 సీట్లు గెలిచి కూటమి అధికారంలోకి వచ్చింది. గత రెండేళ్లుగా మిత్రపక్షాల ఎమ్మెల్యేలు ఉన్న చోట్ల TDP పెద్దగా కార్యక్రమాలు నిర్వహించలేదు. స్థానిక ఎన్నికలు రానున్న నేపథ్యంలో ఇప్పుడు ఆ నియోజకవర్గాలపై దృష్టి పెట్టింది.

కొన్ని చోట్ల TDP, జనసేన మధ్య క్షేత్రస్థాయి విభేదాలు ఉన్నట్లు సమాచారం. వాటిని ఆయా పార్టీల అధిష్టానాలు సరిదిద్దే పనిలో ఉన్నాయి. మిత్రపక్ష ఎమ్మెల్యేలతో సత్సంబంధాలు కొనసాగిస్తూనే, పార్టీ సంస్థాగత బలోపేతంపై దృష్టి పెట్టాలని TDP భావిస్తోంది.

175 నియోజకవర్గాల్లోనూ పార్టీ బలపడాలన్నదే లక్ష్యంగా TDP ప్రయత్నాలు మొదలుపెట్టింది. స్థానిక ఎన్నికల ముందు కొత్త ఇంఛార్జీల నియామకం, కార్యకర్తలతో సమన్వయం వంటి చర్యలు తీసుకోనుంది.

ఈ వ్యూహంపై జనసేన, BJP నాయకుల స్పందన తెలియాల్సి ఉంది.