ఎమ్మెల్యేలు లేని 40 నియోజకవర్గాల్లో టీడీపీ దృష్టి; కొత్తగా ఇంచార్జీల నియామకం

తెలుగుదేశం పార్టీ రాష్ట్రంలో తన ఎమ్మెల్యేలు లేని 40 అసెంబ్లీ నియోజకవర్గాల్లో పార్టీ బలోపేతానికి కసరత్తు చేస్తోంది. మిత్ర పార్టీలైన జనసేన, బీజేపీలకు వరుసగా 21, 8 ఎమ్మెల్యేలు ఉండగా, వైకాపా 11 నియోజకవర్గాల్లో ఎమ్మెల్యేలుగా ఉన్నారు.

టీడీపీ అధినేత చంద్రబాబు నాయుడు ఈ నియోజకవర్గాల్లో ఇంచార్జీల నియామకంపై దృష్టి పెట్టారు. వైకాపా ఎమ్మెల్యేలు ఉన్న చోట్ల ‘డి అంటే డి’ అనే నియోజకవర్గ ఇంచార్జీలు ఉండాలని, జనసేన, బీజేపీ ఎమ్మెల్యేలు ఉన్న స్థానాల్లో అందరితో సమన్వయంతో పనిచేసే ఇంచార్జీలను నియమించాలని ఆదేశించారు. ఇప్పటికే కొన్ని నియోజకవర్గాల్లో ఇంచార్జీలు ఉండగా, మరికొన్ని చోట్ల సమన్వయ కమిటీలు పని చేస్తున్నాయి. సరిగా పని చేయని, మిత్ర పక్షాలతో అనవసర వివాదాలు పెట్టుకునే వారిపై చంద్రబాబు కఠినంగా వ్యవహరిస్తున్నట్లు తెలుస్తోంది.

ఇటీవల జిల్లా ఇంచార్జి మంత్రులు, జోనల్ కోఆర్డినేటర్లతో సమీక్ష అనంతరం పలు మార్పులు చేశారు. కడప జిల్లా బద్వేల్ నియోజకవర్గ ఇంచార్జి రితేష్ రెడ్డిని తప్పించి స్థానంలో మంచూరి సూర్యనారాయణ రెడ్డిని నియమించారు. దివంగత వీరారెడ్డి కుటుంబానికి పార్టీలో సరైన ప్రాధాన్యం ఇస్తామనే హామీతో రితేష్‌ను పక్కన పెట్టినట్లు సమాచారం. కాకినాడ రూరల్ ఇంచార్జి బాధ్యతలు పిల్లి అనంత లక్ష్మికి అప్పగించారు. తిరుపతి నియోజకవర్గానికి జేబీ శ్రీనివాస్‌ను ఇటీవల ఇంచార్జిగా నియమించారు.

అవనిగడ్డకు వికృతి శ్రీనివాస్, విజయవాడ వెస్ట్ స్థానానికి బుద్ధ వెంకన్న పేర్లు పరిశీలనలో ఉన్నట్లు తెలిసింది. ఎచ్చర్ల, విశాఖ నార్త్ నియోజకవర్గాల ఇంచార్జీల నియామకంపై చంద్రబాబు దృష్టి సారించారు; మరో నాలుగు రోజుల్లో నిర్ణయం తీసుకునే అవకాశం ఉంది. అనపర్తి (బీజేపీ ఎమ్మెల్యే నల్లమిల్లి రామకృష్ణా రెడ్డి నియోజకవర్గం)కి ఆయన కుమారుడిని టీడీపీ ఇంచార్జిగా నియమించే అవకాశం ఉంది. కైకలూరు, పి.గన్నవరం, తంబల్లపల్లిలకు త్వరలో కొత్త ఇంచార్జీలు రానున్నారు.

పాడేరు, పుంగనూరు, అరకు నియోజకవర్గాల ఇంచార్జీలను మార్చే యోచనలో పార్టీ అధిష్టానం ఉన్నట్లు తెలుస్తోంది.