ఆశా వర్కర్లకు ₹20 లక్షల ప్రమాద బీమా.. 180 రోజుల ప్రసూతి సెలవులకు ప్రభుత్వం ఒప్పుకోలు

తెలంగాణలోని ఆశా వర్కర్లకు ₹20 లక్షల ప్రమాద బీమా కల్పించేందుకు రాష్ట్ర ప్రభుత్వం అంగీకరించింది. 180 రోజుల ప్రసూతి సెలవులకూ ప్రభుత్వం అంగీకారం తెలిపింది. రాష్ట్రంలో సుమారు 26 వేల మంది ఆశా వర్కర్లు పని చేస్తున్నారు.

ఆశా వర్కర్ల డిమాండ్లపై ప్రభుత్వం వారితో చర్చలు జరిపింది. ప్రధానంగా బీమా అంశంపై సానుకూల నిర్ణయం తీసుకుంది. విధి నిర్వహణలో ప్రమాదం జరిగి మరణిస్తే కుటుంబానికి ఆర్థిక సహాయం అందేలా ఈ బీమా ఉంటుంది. సాధారణ మరణం జరిగినా బీమా కల్పించేందుకు ప్రభుత్వం ఒప్పుకుంది.

ప్రసూతి సెలవుల విషయంలోనూ ప్రభుత్వం సానుకూలంగా స్పందించింది. 180 రోజుల మెటర్నిటీ లీవ్ ఇద్దరు పిల్లల వరకు వర్తిస్తుందని చర్చల్లో తెలిపినట్లు ఆశా వర్కర్లు చెప్పారు. జనవరి నాటికి పూర్తి స్థాయిలో అమలయ్యే విధంగా చూస్తామని మంత్రి తెలిపినట్లు వారు పేర్కొన్నారు.

అయితే ₹18,000 నిర్ణీత వేతనం, ఉద్యోగ భద్రత అంశాలపై ఇంకా స్పష్టత రాలేదు. కాంగ్రెస్ మేనిఫెస్టోలో పేర్కొన్న ₹18,000 వేతనం తమకు కావాలని ఆశా వర్కర్లు డిమాండ్ చేస్తున్నారు. ఈ అంశాన్ని సీఎం దృష్టికి తీసుకెళ్తామని మంత్రి చెప్పినట్లు యూనియన్ తెలిపింది.

బీమా, ప్రసూతి సెలవులు వచ్చే ఏడాది జనవరి నుంచి అమలయ్యే అవకాశం ఉంది. తమ సమస్యలపై ప్రభుత్వం సానుకూలంగా స్పందించినందుకు ఆశా వర్కర్ల యూనియన్ మంత్రి, సీఎంలకు కృతజ్ఞతలు తెలిపింది.