తెలంగాణలో నామినేటెడ్ పదవుల భర్తీకి సీఎం రేవంత్ రెడ్డి గ్రీన్ సిగ్నల్

తెలంగాణలో నామినేటెడ్ పదవుల భర్తీకి CM రేవంత్ రెడ్డి ఆమోదం తెలిపారు. ఈ నెల చివరిలోగా పదవులు భర్తీ చేయాలని పార్టీ నిర్ణయించింది.

ఈ మేరకు PCC చీఫ్ మహేష్ గౌడ్, CM రేవంత్ రెడ్డితో భేటీ అయ్యారు. గత రెండు రోజులుగా MP వేం నరేందర్ రెడ్డితోనూ సమావేశాలు జరిగాయి. కార్పొరేషన్ చైర్‌పర్సన్‌లతో పాటు డైరెక్టర్ పదవులను కూడా ఒకేసారి భర్తీ చేయాలని నిర్ణయించారు. అధికారిక ప్రకటన మాత్రం ఇంకా రాలేదు.

గతంలో 37 మందిని వివిధ కార్పొరేషన్‌ల చైర్‌పర్సన్‌లుగా నియమించారు. వారి పదవీకాలం ముగిసింది. వారు పదవుల రెన్యూవల్ కోసం ఎదురుచూస్తున్నారు. మిగిలిన నాయకులు కొత్త పదవుల కోసం వేచి ఉన్నారు.

ప్రతిపక్షంలో ఉన్నప్పుడు పార్టీ కోసం పనిచేసిన నాయకులు పదవుల కోసం ఆశగా ఉన్నారు. దసరా, దీపావళి పండుగలకు పదవులు వస్తాయని చాలా మంది భావించారు. కానీ ఆ రెండు పండుగలు గడిచిపోయాయి. పదవులపై స్పష్టత రాలేదు.

ఇప్పుడు ఈ నెలలోపు భర్తీ పూర్తి చేసేందుకు కసరత్తు జరుగుతోంది. ఈ నెలలోపు పదవులు భర్తీ అవుతాయని పార్టీ వర్గాల్లో వినిపిస్తోంది. ఈసారైనా నామినేటెడ్ పదవులు భర్తీ అవుతాయా అనేది రాబోయే రోజుల్లో తేలనుంది.