కుటుంబ వివరాల రిజిస్ట్రీ: తెలంగాణలో ఫ్యామిలీ రిజిస్టర్ సర్టిఫికెట్‌కు ప్రభుత్వం ఆమోదం

తెలంగాణ ప్రభుత్వం రాష్ట్రంలోని కుటుంబాల వివరాలను ఎలక్ట్రానిక్ రూపంలో నమోదు చేయడానికి ఫ్యామిలీ రిజిస్టర్‌ను ఏర్పాటు చేయాలని నిర్ణయించింది. ప్రభుత్వ, ప్రైవేట్ సేవల కోసం కుటుంబ ధ్రువీకరణలో ఏకరూపత, సులభ ప్రాప్యత కల్పించడమే లక్ష్యమని ప్రభుత్వం తెలిపింది.

ఈ మేరకు మీ సేవ కేంద్రాల ద్వారా ఫ్యామిలీ రిజిస్టర్ సర్టిఫికెట్ జారీ చేసేందుకు వీలుగా ఉత్తర్వులు వెలువడ్డాయి. రిజిస్టర్‌లో కుటుంబ యజమాని పేరు, సభ్యుల పేర్లు, బంధుత్వం, వయసు, పుట్టిన తేదీ, లింగం, ఆధార్ నంబర్, చిరునామా వంటి వివరాలు నమోదు చేస్తారు. ప్రతి కుటుంబానికి ఒక ప్రత్యేక గుర్తింపు నంబర్ కేటాయిస్తారు.

అయితే ఈ ఫ్యామిలీ రిజిస్టర్ కేవలం డేటాబేస్ కోసమేనని, దీని ద్వారా ఎటువంటి చట్టపరమైన హక్కులు ఉండవని ప్రభుత్వం స్పష్టం చేసింది. ఆస్తిపై టైటిల్ రాదు, వారసత్వం ధృవీకరించదు, ప్రభుత్వ పథకాల లబ్ధికి ఉపయోగపడదు. కేవలం కుటుంబ వివరాల నమోదుకు మాత్రమే ఇది పరిమితం.

దరఖాస్తు ప్రక్రియ పూర్తిగా డిజిటల్. కుటుంబంలోని మేజర్ సభ్యుడు మీ సేవ కేంద్రం, ఆన్‌లైన్ పోర్టల్ లేదా మొబైల్ యాప్ ద్వారా దరఖాస్తు చేసుకోవచ్చు. నిర్ణీత ఫీజు చెల్లించాలి. దరఖాస్తు చేసిన రెండు మూడు రోజుల్లో సర్టిఫికెట్ జారీ చేస్తారు.

ఈ సర్టిఫికెట్‌కు ఓటరు గుర్తింపులోనూ ప్రాధాన్యత ఉంది. కేంద్ర ఎన్నికల సంఘం గుర్తించిన 12 రకాల ఐడెంటిటీ డాక్యుమెంట్లలో ఫ్యామిలీ రిజిస్టర్ సర్టిఫికెట్ 10వ పత్రంగా చేరింది. ఇతర గుర్తింపు పత్రాలు లేని వారికి ఓటు హక్కు నిరూపణకు ఇది ఉపయోగపడుతుందని అధికారులు తెలిపారు.