తెలంగాణలో సంతానోత్పత్తి రేటు 1.4కు పడిపోయింది — నిపుణులు హెచ్చరిక

తెలంగాణలో సంతానోత్పత్తి రేటు రీప్లేస్మెంట్ స్థాయి 2.1 కంటే చాలా దిగువకు పడిపోయింది. పట్టణ ప్రాంతాల్లో ఈ రేటు 1.4గా, గ్రామీణ ప్రాంతాల్లో 1.5 నుంచి 1.6గా నమోదైందని తాజా గణాంకాలు వెల్లడించాయి. దీనిపై హైదరాబాద్‌లో ఒక అవగాహన కార్యక్రమం నిర్వహించగా, డాక్టర్ దీప్తి, డాక్టర్ గేంద్ర తదితర నిపుణులు పాల్గొన్నారు. వివాహాలు ఆలస్యం కావడం, జీవనశైలి మార్పులు, ఒత్తిడి, పర్యావరణ కాలుష్యం వంటి అంశాలు స్త్రీల సంతాన సామర్థ్యంపై ప్రభావం చూపుతున్నాయని వారు వివరించారు. గతంలో 20–25 ఏళ్ల వయసులోనే వివాహాలు జరిగి పిల్లలు పుట్టేవారని, ప్రస్తుతం 40 ఏళ్లకు కూడా పెళ్లి కావడం లేదని వారు చెప్పారు. ఈ నేపథ్యంలో ప్రజల్లో సరైన సమాచారం అందించడం, ART (అసిస్టెడ్ రీప్రొడక్టివ్ టెక్నాలజీ) చట్టం గురించి తెలియజేయడం ఈ కార్యక్రమం లక్ష్యమని డాక్టర్ దీప్తి తెలిపారు. IVF కేంద్రాలు అనైతికంగా మారకుండా ఉండేందుకు 2022 జూన్ 7న అమల్లోకి వచ్చిన ART చట్టం-2021 కఠిన శిక్షలను విధించిందని డాక్టర్ గేంద్ర వివరించారు. ఈ చట్టం ప్రకారం ART బ్యాంకులు, క్లినిక్‌లు నిబంధనలు పాటించాల్సి ఉంటుందని, తద్వారా పద్ధతులు నైతికంగా, పారదర్శకంగా మారతాయని అన్నారు.