సినిమా టికెట్ రేటు పెంపులో 20% కార్మికులకు ఇవ్వాలని అనిల్ డిమాండ్

తెలంగాణలో సినిమా టికెట్ రేటు పెంపులో 20% వాటా సినీ కార్మికులకు చెల్లించాలని ఫిల్మ్ ఫెడరేషన్ నేత అనిల్ వల్లభనేని ప్రభుత్వాన్ని కోరారు. ఈ మేరకు ముఖ్యమంత్రి రేవంత్ రెడ్డి ప్రకటించిన GO అమలుకు నిర్మాతలు సహకరించాలని ఆయన చెప్పారు.

లేబర్ డిపార్ట్‌మెంట్‌లో జరిగిన అగ్రిమెంట్ల ప్రకారం వేతనాలు అమలవుతాయని అనిల్ వల్లభనేని తెలిపారు. అందులో కొంత వ్యత్యాసం ఉందని, ఆ విషయాన్ని ముఖ్యమంత్రి దృష్టికి తీసుకెళ్లామని చెప్పారు. ప్రొడ్యూసర్స్ కౌన్సిల్ ఎన్నికలు ప్రకటించడంతో సెప్టెంబర్ 12 వరకు సమయం ఇవ్వాలని అడిగారని, దానికి అంగీకరించామని ఆయన వివరించారు.

సినిమా టికెట్ రేటు పెంపులో 20% కార్మికులకు చెందేలా ప్రభుత్వం GO ఇచ్చిందని అనిల్ వల్లభనేని పేర్కొన్నారు. ఇప్పటివరకు ఐదు సినిమాలకు సంబంధించి కొంత మొత్తం మాత్రమే వచ్చిందని, మిగతా సినిమాల డబ్బులు ఇంకా రాలేదని చెప్పారు. ఆ మొత్తాన్ని వెంటనే ఫెడరేషన్ అకౌంట్‌లో జమ చేయాలని నిర్మాతలకు ఆదేశాలు వచ్చినట్లు ఆయన తెలిపారు.

వచ్చే నిధులతో సినీ కార్మికులందరికీ ₹5 లక్షల death insurance లేదా ఆరోగ్యశ్రీ కల్పిస్తామని ముఖ్యమంత్రి హామీ ఇచ్చారని ఆయన గుర్తు చేశారు. లేబర్ డిపార్ట్‌మెంట్ కార్మికుల డేటా సేకరించిందని తెలిపారు. టాక్సిక్ వంటి డబ్బింగ్ సినిమాలకు టికెట్ రేటు పెంచితే అక్కడ కూడా 20% వాటా రావాలి. ఈ మేరకు మరో GO ఈరోజు వచ్చే అవకాశం ఉందని ఆయన చెప్పారు.