కరువు పరిస్థితులపై ప్రభుత్వం సమగ్ర నివేదిక తయారు చేస్తోంది

రాష్ట్రంలో ఎల్నినో ప్రభావంతో ఏర్పడుతున్న కరువు పరిస్థితులపై ప్రభుత్వం దృష్టి పెట్టింది. ప్రాథమికంగా 18 జిల్లాల్లోని 320 మండలాల్లో కరువు పరిస్థితులు ఉన్నట్లు అధికారులు గుర్తించారు.

అక్టోబర్ నెలాఖరులోగా సమగ్ర కరువు నివేదిక సిద్ధం చేయాలని అధికారులు లక్ష్యంగా పెట్టుకున్నారు. నివేదిక పూర్తయిన తర్వాత సర్వపక్ష సమావేశం నిర్వహించాలని ప్రభుత్వం భావిస్తోంది. కరువు పరిస్థితులు, రైతులపై ప్రభావం, తీసుకోవాల్సిన చర్యలపై పార్టీల అభిప్రాయాలు తీసుకోనున్నారు.

జూన్ నుంచి సెప్టెంబర్ వరకు నైరుతి రుతుపవనాల సీజన్లో నమోదైన వర్షపాతంతో పాటు మొత్తం 12 ప్రామాణిక అంశాల ఆధారంగా కరువు తీవ్రతను అంచనా వేయనున్నారు. వర్షపాతమే కాకుండా సాగు పరిస్థితులు, తాగునీటి లభ్యత, భూగర్భ జలాలు, పంటల పరిస్థితి, నీటి వనరుల లభ్యతను పరిగణనలోకి తీసుకోనున్నారు.

ప్రణాళిక, రెవెన్యూ, గ్రౌండ్ వాటర్, వ్యవసాయ, పంచాయతీరాజ్, గ్రామీణ మంచినీటి సరఫరా విభాగాల నుంచి సమాచారం సేకరిస్తున్నారు. జిల్లాలు, మండలాల వారీగా వచ్చిన సమాచారాన్ని ప్రభుత్వ ప్రణాళికలతో సరిపోల్చనున్నారు. క్షేత్ర స్థాయిలో పరిస్థితులు పరిశీలించిన తర్వాతే కరువు ప్రభావిత మండలాలపై అధికారిక నిర్ణయం తీసుకోనున్నారు.

ప్రాథమికంగా గుర్తించిన 320 మండలాల సంఖ్య తుది నివేదికలో మారే అవకాశం ఉంది. వ్యవసాయంపై కరువు ప్రభావం, భవిష్యత్ తాగునీటి పరిస్థితి, భూగర్భ జలమట్టాలు, పంటల పరిస్థితి వంటి అంశాలను నివేదికలో పొందుపరచనున్నారు.